Twitter: పాక్‌ ప్రభుత్వ ట్విటర్ ఖాతా.. భారత్‌లో నిలిపివేత..!

దిల్లీ: పాక్‌ ప్రభుత్వ ట్విటర్‌ ఖాతా భారత్‌లో నిలిపివేతకు గురైంది. చట్టపరమైన డిమాండ్ కారణంగా ఈ చర్య చేపట్టినట్లు ఆ ఖాతాలో సందేశం కనిపించింది. శనివారం ఉదయం ఓ వార్తా ఏజెన్సీ  దీనికి సంబంధించిన స్క్రీన్‌ షాట్‌ను షేర్ చేసింది. ‘భారత్‌లో పాకిస్థాన్‌ ప్రభుత్వ ట్విటర్ ఖాతాను నిలిపివేశారు’ అని పేర్కొంది.

జులైలో కూడా ఈ ఖాతాను బ్లాక్‌ చేశారు. తర్వాత పునరుద్ధరించారు. ట్విటర్ నిబంధనల ప్రకారం.. చట్టబద్ధమైన డిమాండ్‌(కోర్టు ఆదేశాలు వంటివి)కు అనుగుణంగా ఈ తరహా చర్యలు చేపడుతుంది. తాజా నిలిపివేతతో పాకిస్థాన్‌ ప్రభుత్వానికి చెందిన ఫీడ్‌.. భారత ట్విటర్ వినియోగదారులకు కనిపించదు.

ఇటీవల కేంద్ర ప్రభుత్వం 16 యూట్యూబ్ ఛానళ్లను నిషేధించింది. వీటిలో 10 భారత్‌కు చెందినవి కాగా, మరో ఆరు పాకిస్థాన్‌ కేంద్రంగా నడుస్తున్నాయి. ఓ ఫేస్‌బుక్‌ ఖాతాపైనా నిషేధం విధించింది. జాతీయ భద్రత, విదేశీ సంబంధాలు, పబ్లిక్‌ ఆర్డర్‌కు సంబంధించి తప్పుడు సమాచారాన్ని ప్రసారం చేసినందుకు ఈ చర్యలు చేపట్టినట్లు కేంద్ర సమాచార మంత్రిత్వశాఖ వెల్లడించింది.

విద్వేష సమాచార వ్యాప్తి కట్టడిలో భాగంగా ఇప్పటికే కేంద్రం పలు సామాజిక మాద్యమ ఖాతాలపై నిషేధం విధించింది. ఈ క్రమంలో  ఇప్పటి వరకూ 100 యూట్యూబ్ ఛానళ్లు, 4 ఫేస్‌బుక్‌ ఖాతాలు, 5 ట్విటర్, 3 ఇన్‌స్టాగ్రాం ఖాతాలను బ్లాక్‌ చేసింది.