Kerala Man:కొండ చీలికలో చిక్కిన యువకుడి కథ సుఖాంతం

పాలక్కాడ్: కేరళలో మలప్పుజ సమీపంలో రెండురోజులుగా కొండ చీలికలో చిక్కుకున్న యువకుడి కథ సుఖాంతమైంది. భారత సైన్యం చేపట్టిన సహాయక చర్యలు ఫలించడంతో అతడికి ప్రమాదం తప్పింది.

ఇటీవల కేరళకు చెందిన ఆర్‌.బాబు ఇద్దరు మిత్రులతో కలిసి మలప్పుజ సమీపంలోని కొండ శిఖరం ఎక్కే ప్రయత్నం చేశాడు. మిగతా ఇద్దరు మధ్యలోనే వెనక్కి వెళ్లినా.. బాబు మాత్రం విజయవంతంగా శిఖరం వరకు చేరుకున్నాడు. అయితే ఉన్నట్టుండి కిందికి జారి, కొండ చీలిక వద్ద చిక్కుకుపోయాడు. సమాచారం అందిన వెంటనే సహాయక బృందాలు చర్యలు చేపట్టినప్పటికీ.. అతడి వరకూ చేరుకోలేకపోయాయి. దాంతో గత రెండు రోజులుగా అతడు తిండి, నీరు లేక ఒంటరిగా అక్కడే గడపాల్సి వచ్చింది. పరిస్థితిని గమనించిన ముఖ్యమంత్రి పినరయి విజయన్ భారత సైన్యం సహాయం కోరారు. దాంతో ఆర్మీకి చెందిన సదరన్‌ కమాండ్ ఈ రోజు రంగంలోకి దిగి, అతడిని ప్రాణాపాయం నుంచి కాపాడింది.

ఈ ఆపరేషన్‌కు సంబంధించిన చిత్రాలను సదరన్‌ కమాండ్ ట్విటర్‌లో షేర్ చేసింది. సుశిక్షితులైన తమ బృంద సభ్యులు యువకుడిని రక్షించాయని ప్రశంసించింది. ఆపరేషన్ అనంతరం ఆర్మీ సిబ్బంది విజయ చిహ్నం చూపిస్తూ..చిరునవ్వులు చిందించారు.