Railway Board: గూడ్స్‌ రైలులో ఇనుప ఖనిజం.. ప్రమాద తీవ్రతకు అదీ ఓ కారణమే : రైల్వే బోర్డు

దిల్లీ: ఒడిశాలో రైలు ప్రమాదం (Odisha Train Accident) తీరని విషాదాన్ని మిగిల్చిన విషయం తెలిసిందే. ఈ ఘటనలో ఇప్పటివరకు 275 మంది మృతి చెందారు. ఈ క్రమంలోనే రైలు ప్రమాదంపై రైల్వే బోర్డు (Railway Board) స్పందించింది. సిగ్నలింగ్‌ (Signalling)లో సమస్య కారణంగా ఈ ప్రమాదం చోటుచేసుకున్నట్లు ప్రాథమికంగా తేలిందని వెల్లడించింది. అయితే, దీనిపై రైల్వే సేఫ్టీ కమిషనర్ (Commissioner of Railway Safety) నుంచి పూర్తిస్థాయి నివేదిక రావాల్సి ఉందని తెలిపింది. ఈ ఘటనలో కోరమాండల్ ఎక్స్‌ప్రెస్ (Coromandel Express) మాత్రమే ప్రమాదానికి గురయినట్లు, ఆ సమయంలో దాని వేగం దాదాపు గంటకు 128 కి.మీలుగా ఉన్నట్లు పేర్కొంది. గూడ్స్‌ రైలులో ఇనుప ఖనిజం ఉండటంతో.. ప్రమాద తీవ్రత పెరిగిందని చెప్పింది.

‘ఈ ఘటనలో గూడ్స్ రైలు పట్టాలు తప్పలేదు. లూప్‌ లైన్‌లో ఆగి ఉన్న ఆ గూడ్స్ రైలులో ఇనుప ఖనిజం ఉంది. దాన్ని కోరమాండల్ ఎక్స్‌ప్రెస్‌ వేగంగా ఢీకొట్టడంతో.. బోగీలపై తీవ్ర ప్రభావం పడింది. ఇది భారీ సంఖ్యలో మరణాలు, గాయాలకు దారితీసింది. ఈ క్రమంలోనే ‘కోరమాండల్’ బోగీలు చెల్లాచెదురై డౌన్‌లైన్‌లోకి వచ్చి పడ్డాయి. అదే సమయంలో డౌన్‌లైన్‌లో గంటకు 126 కి.మీ వేగంతో వెళ్తోన్న బెంగళూరు- హావ్‌డా రైలు చివరి రెండు బోగీలను ఢీకొట్టాయి’ అని రైల్వే బోర్డు (ఆపరేషన్ అండ్ బిజినెస్ డెవలప్‌మెంట్) సభ్యురాలు జయవర్మ సిన్హా వెల్లడించారు. ఈ రెండు రైళ్ల వేగ పరిమితి గంటకు 130 కి.మీలు అని, ఈ నేపథ్యంలో ఇక్కడ అతి వేగం ప్రమాదానికి కారణం కాదన్నారు. ‘కవచ్‌’ వ్యవస్థ ఉన్నప్పటికీ.. ఇటువంటి ప్రమాదాన్ని నివారించడంలో దోహదపడదని చెప్పారు. బాధిత కుటుంబీకులు హెల్ప్‌లైన్ నంబర్ 139ను సంప్రదించవచ్చని సూచించారు. వారి ప్రయాణం, ఇతర ఖర్చులు భరిస్తామని తెలిపారు.