Mobile Phones: ఆ ఊరిలో పిల్లలు ఫోన్లు వాడరాదు

మహారాష్ట్రలో ఓ గ్రామ పంచాయతీ తీర్మానం

యవత్‌మాల్‌: మహారాష్ట్ర యవత్‌మాల్‌ జిల్లాలోని బన్సి గ్రామ పంచాయతీ అరుదైన నిర్ణయం తీసుకుంది. 18 ఏళ్ల లోపు వారు మొబైల్‌ ఫోన్‌ వాడకుండా నిషేధం విధించింది. ఈ నెల 11న ఈ మేరకు తీర్మానం చేసినట్లు గ్రామ సర్పంచి గజానన్‌ గురువారం వెల్లడించారు. లాక్‌డౌన్‌ సమయంలో పిల్లల్లో మొబైల్‌ ఫోన్ల వినియోగం పెరిగిందని, ఆ తర్వాత అది వ్యసనంగా మారిందని ఆయన పేర్కొన్నారు. పిల్లలు మళ్లీ చదువుపై శ్రద్ధ పెట్టేందుకే ఈ నిర్ణయం తీసుకున్నట్లు తెలిపారు. దీన్ని ఉల్లంఘించినవారికి జరిమానా విధించనున్నట్లు తెలిపారు.