Wrestlers Protest: అనురాగ్‌ ఠాకూర్‌తో భేటీ.. రెజ్లర్ల 5 డిమాండ్లు

దిల్లీ: లైంగిక వేధింపుల ఆరోపణలు ఎదుర్కొంటోన్న భాజపా ఎంపీ బ్రిజ్‌భూషణ్‌ (Brij Bhushan Sharan Singh)కు వ్యతిరేకంగా రెజ్లర్లు చేపట్టిన నిరసనలో బుధవారం కీలక పరిణామం చోటుచేసుకుంది. ఈ ఆందోళనపై స్పందించిన కేంద్రప్రభుత్వం వారిని మరోసారి చర్చలకు ఆహ్వానించింది. ఈ క్రమంలోనే కేంద్ర క్రీడల మంత్రి అనురాగ్‌ ఠాకూర్‌తో రెజ్లర్లు నేడు భేటీ అయ్యారు. ఈ సందర్భంగా కేంద్రమంత్రి ముందు రెజ్లర్లు 5 డిమాండ్లను ఉంచినట్లు తెలుస్తోంది. బ్రిజ్ భూషణ్‌ను అరెస్టు చేయడంతో పాటు రెజ్లింగ్‌ సమాఖ్యకు మహిళా అధ్యక్షురాలిని నియమించాలని వారు డిమాండ్‌ చేశారు.

రెజ్లర్ల ఆందోళనపై కేంద్రమంత్రి అనురాగ్‌ ఠాకూర్‌ అర్ధరాత్రి ఓ ట్వీట్ చేశారు.  ‘‘రెజ్లర్ల సమస్యలపై వారితో చర్చించేందుకు ప్రభుత్వం సిద్ధంగా ఉంది. ఈ విషయమై వారిని మరోసారి చర్చలకు ఆహ్వానించాను’’ అని ఆయన పేర్కొన్నారు. కేంద్రమంత్రి ఆహ్వానాన్ని రెజ్లర్లు అంగీకరించారు. ఈ ఉదయం బజ్‌రంగ్ పునియా, సాక్షి మాలిక్‌ చర్చల నిమిత్తం అనురాగ్‌ ఠాకూర్‌ ఇంటికి వెళ్లారు. ఈ సందర్భంగా రెజ్లర్లు 5 డిమాండ్లను కేంద్రమంత్రి ముందుంచినట్లు పలు జాతీయ మీడియా కథనాలు వెల్లడించాయి. ఆ డిమాండ్లు ఇలా ఉన్నాయి..

• భారత రెజ్లింగ్‌ సమాఖ్య అధ్యక్ష పదవిని మహిళకు అప్పగించాలి.
• బ్రిజ్‌ భూషణ్‌ గానీ, ఆయన కుటుంబసభ్యులు గానీ రెజ్లింగ్‌ సమాఖ్యలో భాగం కాకూడదు.
• రెజ్లింగ్‌ సమాఖ్యలో అవినీతి ఆరోపణలు వచ్చిన నేపథ్యంలో పాలక మండలికి పారదర్శకంగా ఎన్నికలు నిర్వహించాలి.
• ఏప్రిల్‌ 28న జంతర్‌మంతర్‌ వద్ద జరిగిన ఉద్రిక్తతల కారణంగా మాపై నమోదు చేసిన ఎఫ్‌ఐఆర్‌లను రద్దు చేయాలి.
• లైంగిక వేధింపుల ఆరోపణలు ఎదుర్కొంటున్న బ్రిజ్‌ భూషణ్‌ను అరెస్టు చేయాలి.

కాగా.. ప్రభుత్వంతో రెజ్లర్లు చర్చలు జరపడం వారంలో ఇది రెండోసారి. గత శనివారం కేంద్ర హోంమంత్రి అమిత్ షాతో వీరు భేటీ అయిన విషయం తెలిసిందే. అయితే ఆ సమావేశంలో తమకు ఆశించిన ఫలితం దక్కలేదని బజ్‌రంగ్ పునియా తెలిపారు.