Jammu: జమ్మూలో మరో ఎన్‌కౌంటర్‌.. ఇద్దరు ఉగ్రవాదులు హతం

శ్రీనగర్‌ : జమ్ము కశ్మీర్‌లోని కుల్గామ్‌లో కాల్పులు చోటు చేసుకున్నాయి. భద్రతా బలగాలు, ఉగ్రవాదుల మధ్య జరిగిన కాల్పుల్లో ఇద్దరు ముష్కరులు హతమయ్యారు. ఈ విషయాన్ని పోలీసు ఉన్నతాధికారి ఒకరు ధ్రువీకరించారు. నవపొరాలోని మీర్‌ బజార్‌ ప్రాంతంలో లష్కరే తొయిబా సంస్థకు చెందిన ఉగ్రవాదులు ఉన్నట్లు సమాచారం అందుకున్న భద్రతా బలగాలు కార్డన్‌ సెర్చ్ ఆపరేషన్‌ నిర్వహించాయి. ఈ క్రమంలో భద్రతా బలగాల రాకను పసిగట్టిన ఉగ్రవాదులు వారిపై కాల్పులు ప్రారంభించారు. సైనిక బలగాలు కూడా ఎదురుకాల్పులు జరిపాయి. ఈ కాల్పుల్లో ఇద్దరు ఉగ్రవాదులు మృతి చెందారని కశ్మీర్‌ జోన్‌ పోలీసులు తెలిపారు. 

ఇదిలా ఉంటే.. జమ్మూ కశ్మీర్‌లో అమర్‌నాథ్‌ యాత్ర జూన్‌ 30న ప్రారంభంకానుంది. ఈ యాత్రకు ఇప్పటికే జమ్మూలోని బేస్ క్యాంప్‌ల వద్దకు వందలాది మంది భక్తులు చేరుకున్నారు. ఈ నేపథ్యంలో భద్రతా ఏర్పాట్లను కట్టుదిట్టం చేశారు. సైన్యం ప్రత్యేక దళాలను ఏర్పాటు చేసి ఉగ్రవాదుల జాడను పసిగడుతున్నాయి. కాగా.. 43 రోజుల పాటు సాగే ఈ అమర్‌నాథ్ యాత్ర జూన్‌ 30న మొదలై ఆగస్టు 11న ముగియనుంది.