Maharashtra: ‘మహా’ సీఎం ఠాక్రే బావమరిది కార్యాలయంపై ఈడీ దాడులు

ముంబయి: మహారాష్ట్ర ముఖ్యమంత్రి, శివసేన చీఫ్‌ ఉద్ధవ్​ ఠాక్రే బంధువు కార్యాలయాలపై ఎన్​ఫోర్స్​మెంట్​ డైరెక్టరేట్​ (ఈడీ) మంగళవారం దాడులు చేపట్టింది. మనీలాండరింగ్​ కేసు దర్యాప్తులో భాగంగా ఈ సోదాలు నిర్వహించిన ఈడీ.. ఠాణెలోని నీలాంబరి ప్రాజెక్టులో భాగమైన 11 రెసిడెన్షియల్​ ఫ్లాట్లను అటాచ్​ చేసింది. శ్రీసాయిబాబా గృహనిర్మితి ప్రైవేట్​ లిమిటెడ్​కు చెందిన ఈ ఆస్తులు ఉద్ధవ్‌ ఠాక్రే బావమరిది (ఠాక్రే సతీమణి రష్మీ ఠాక్రే సోదరుడు) శ్రీధర్​ మాధవ్​ పటాంకర్​ పేరుపై ఉన్నాయి. మొత్తం రూ.6.45 కోట్లు విలువ చేసే ఆస్తులను ఈడీ అటాచ్​ చేసింది.

పుష్పక్ ​గ్రూప్​ మనీలాండరింగ్​ కేసు దర్యాప్తులో భాగంగా.. సంబంధిత సంస్థ శ్రీధర్​ మాధవ్​కు చెందిన శ్రీసాయిబాబా గృహనిర్మితికి నగదును బదిలీ చేసినట్లు తమకు సమాచారం అందిందని ఈడీ వెల్లడించింది. పుష్పక్​ గ్రూప్​ కేసు నిందితుడు మహేశ్​ పటేల్​, మరో నిందితుడు నందకిశోర్​ చతుర్వేది సాయంతో శ్రీధర్​ మాధవ్​ సంస్థలోకి నగదును బదిలీ చేసినట్లు తెలిపింది. దాదాపు రూ.50 కోట్లను శ్రీధర్​ మాధవ్​ సంస్థకు చెందిన రియల్​ ఎస్టేట్​ ప్రాజెక్టుల్లో పెట్టుబడిగా పెట్టినట్లు తెలిపింది.

సీఎం ఠాక్రే బంధువు ఆస్తులను ఈడీ అటాచ్​ చేయడంపై శివసేన నేత సంజయ్​ రౌత్​ విమర్శలు గుప్పించారు. ‘భాజపా అధికారంలో లేని రాష్ట్రాల్లో మాత్రమే ఈడీ చర్యలు చేపడుతోంది. గుజరాత్‌ లాంటి రాష్ట్రాల్లో ఈడీ కార్యాలయాలను మూసేసినట్టు ఉంది. సంస్థ కార్యకలాపాలన్నీ మహారాష్ట్రలోనే జరుగుతున్నట్లు ఉంది. మమతా బెనర్జీ మేనల్లుడు అభిషేక్​ బెనర్జీని కూడా ఇదే విధంగా వేధించారు. కానీ అటు బెంగాల్​, ఇటు మహారాష్ట్ర రెండూ ఈ చర్యలకు లొంగిపోవు’ అని రౌత్‌ పేర్కొన్నారు.