North Korea: ‘అణు’కువగా ఉండనంటున్న కిమ్‌.. బైడెన్‌కు కొత్త తలనొప్పి..! 

ఇంటర్నెట్‌డెస్క్‌: ఉత్తరకొరియా అధినేత కిమ్‌ జోంగ్‌ ఉన్‌ సమయం చూసి అమెరికాను దెబ్బకొట్టేందుకు సిద్ధమయ్యారు. ఓ పక్క అఫ్గాన్‌ పరిణామాలతో బైడెన్‌ సర్కారుకు తలబొప్పి కట్టింది.. అదే సమయంలో ఉత్తర కొరియాలో కిమ్‌ సర్కారు మళ్లీ అణు కార్యక్రమాలను వేగవంతం చేసింది. ఈ విషయాన్ని ఐరాస అటామిక్‌ ఏజెన్సీ వెల్లడించింది. తాజాగా యాంగ్‌బ్యొన్‌ అణు రియాక్టర్‌ వినియోగంలోకి తెచ్చినట్లు పేర్కొంది. ఈ రియాక్టర్‌ నుంచి అణ్వాయుధాల్లో ఉపయోగించే ఫ్లూటోనియంను ఉత్పత్తి చేయవచ్చు. అంతర్జాతీయ అణు శక్తి సంస్థను 2009 నుంచి ఇక్కడికి రాకుండా ఉత్తరకొరియా అడ్డుకొన్నా.. ఉపగ్రహ చిత్రాలను విశ్లేషించి అక్కడి పరిస్థితులను ఆ సంస్థఅంచనా వేస్తోంది. 

ఐఏఈఏ సంస్థ ఇక్కడి ఉపగ్రహ చిత్రాలను విశ్లేషించగా.. జులై నుంచి కూలింగ్‌ వాటర్‌ బయటకు వెళుతున్నట్లు గుర్తించింది. రియాక్టర్‌ పనిచేస్తున్న విషయాన్ని ఈ అంశం ధ్రువీకరిస్తోంది. సింగపూర్‌లో 2018లో అమెరికా అధ్యక్షుడు ట్రంప్‌తో ఉ.కొరియా అగ్రనేతతో భేటీ  జరిగిన కొన్ని నెలల్లోనే దీనిని మూసివేశారు.ఇదే కాంప్లెక్సులో ఉన్న అణు ఇంధన రీప్రాసెస్‌ ల్యాబోరేటరీ కూడా పనిచేస్తోందని ఐఏఈఏ పేర్కొంది.  ఈ ల్యాబ్‌ పనిచేయడం భవిష్యత్తులో తీవ్ర సమస్యలకు కారణమవుతుందని పేర్కొంది. ఇది ఐరాస భద్రతా మండలి తీర్మానానికి వ్యతిరేకమని వెల్లడించింది. దీనిపై దక్షిణ కొరియా విదేశాంగ శాఖ స్పందించింది. ఉత్తరకొరియా కార్యకలాపాలను నిరంతరం ఓ కంట కనిపెడుతున్నామని తెలిపింది.