Dawood Ibrahim: పాకిస్థాన్‌లోనే దావూద్‌ ఇబ్రహీం.. కీలక సమాచారం రాబట్టిన ఈడీ!

దిల్లీ: అండర్​ వరల్డ్​ డాన్ ​దావూద్​ ఇబ్రహీం పాకిస్థాన్​లోనే ఉన్నాడంటూ పలు సందర్భాల్లో వార్తలు వచ్చాయి. కాగా వాటిని నిజం చేస్తూ ఎన్‌ఫోఫోర్స్​మెంట్​ డైరెక్టరేట్​ కీలక సమాచారాన్ని రాబట్టింది. దావూద్​ పాక్‌లోని కరాచీలో ఉన్నట్లు అతడి అల్లుడు (దావూద్‌ సోదరి హసీనా పార్కర్​ కుమారుడు) అలీషా పార్కర్ ఈడీకి తెలిపినట్లు సంబంధిత వర్గాలు వెల్లడించాయి. ఓ మనీలాండరింగ్ కేసులో విచారణ సందర్భంగా అలీషా పార్కర్​ ఈ విషయాన్ని చెప్పినట్లు పేర్కొన్నాయి.

మనీలాండరింగ్​ కేసులో విచారణకు హాజరుకావాలని అలీషా పార్కర్​కు ఈడీ పలుమార్లు సమన్లు జారీ చేసింది. ఈ క్రమంలోనే అదుపులోకి తీసుకుని విచారించగా.. దావూద్​ కరాచీలోనే ఉన్నట్లు అతడు పేర్కొన్నాడు. అలీషా​ వాంగ్మూలం నమోదు చేసినట్లు అధికారవర్గాలు తెలిపాయి. ‘నేను పుట్టక ముందే దావూద్​ ముంబయి వదిలి వెళ్లాడు. 1986 వరకు దంబర్వాలా భవన్​లో నివసించాడు. ఆయన ప్రస్తుతం పాకిస్థాన్​లో ఉన్నట్లు చాలా మంది మా బంధువుల ద్వారా తెలిసింది. వాళ్లు భారత్​ను విడిచివెళ్లినప్పుడు నేను ఇంకా పుట్టనేలేదు. వారితో మాకు ఎలాంటి సంబంధాలు లేవు. కానీ, కొన్నిసార్లు ఈద్​, ఇతర పండుగలకు నా భార్య ఆయేషా, నా సోదరీలతో మా మామ దావూద్ భార్య మెహ్జబీన్ మాట్లాడినట్లు తెలుసు’ అని అలీషా పార్కర్ చెప్పినట్లు వెల్లడించాయి.

దావూద్‌కు అక్రమంగా డబ్బు సంపాదించిపెట్టడంతోపాటు, అతడి హవాలా మార్గాల ద్వారా మనీలాండరింగ్‌కు సహకరించిన దావూద్ బంధువులపై ఈడీ విచారణ జరుపుతోంది. అంతకుముందు ఫిబ్రవరిలో ఈ కేసులో చోటా షకీల్ బావ సలీం ఫ్రూట్‌ను ఈడీ విచారించింది. తాజాగా అతడి మేనల్లుడు అలీషా పార్కర్‌ను ప్రశ్నించింది. అయితే తనకు ఎలాంటి లావాదేవీల గురించి తెలియదని అలీషా వెల్లడించినట్లు సమాచారం.