UP: పిల్లిని దొంగిలించాడని.. 30 పావురాలకు విషమిచ్చి చంపిన వ్యక్తి

యూపీ: తను పెంచుకుంటున్న పిల్లిని దొంగిలించాడనే నెపంతో ఓ వ్యక్తి అమానుష చర్యకు పాల్పడ్డాడు. తన పొరుగింటి వ్యక్తి ఎన్నో ఏళ్ల నుంచి అపురూపంగా పెంచుకుంటున్న 30 పావురాల(Pigeons)కు విషమిచ్చి చంపాడు. ఈ హృదయ విదారక సంఘటన ఉత్తరప్రదేశ్‌(UP)లో చోటుచేసుకుంది. దీంతో పక్షులను చంపిన నేరం కింద పోలీసులు నిందితుడిపై ఐపీసీ సెక్షన్‌ 428 కింద కేసు నమోదు చేశారు. 

పోలీసులు తెలిపిన వివరాల ప్రకారం.. యూపీలోని షహంజపుర్‌ జిల్లా పరిధిలో అబిద్‌ అనే వ్యక్తి కొన్నేళ్ల నుంచి పిల్లిని పెంచుకుంటున్నాడు. అయితే కొన్నిరోజుల నుంచి ఆ పిల్లి కనిపించడం లేదు. దీంతో తన పొరుగునే ఉంటున్న పక్షి ప్రేమికుడు వారిస్‌ అలీపై అనుమానం పెంచుకున్నాడు. తనే తన పిల్లిని ఎత్తుకెళ్లి ఉంటాడని, దాన్ని చంపేసి ఉంటాడని కోపంతో కక్ష పెంచుకున్నాడు. దీంతో అలీ ప్రేమగా పెంచుకుంటున్న పావురాలను చంపాలని నిర్ణయించుకున్నాడు. ఈక్రమంలో పావురాలకు వేసే గింజల్లో కొన్ని విషపదార్థాలు కలిపి చల్లాడు. ఆ విషపదార్థాలను తిన్న పావురాలు మృత్యువాత పడ్డాయి. మొత్తం 78 పావురాల్లో 30 చనిపోయాయి. పలు పావురాలు అనారోగ్యానికి గురయ్యాయి. చనిపోయిన పావురాల్లో అరుదైన జాతులకు చెందినవి సైతం ఉన్నాయి. అలీ ఫిర్యాదు మేరకు విచారణ చేపట్టిన పోలీసులు ముగ్గురు వ్యక్తులపై కేసులు నమోదు చేశారు. చనిపోయిన పావురాలను శవపరీక్ష కోసం పంపినట్లు జిల్లా ఏఎస్పీ సంజయ్‌ కుమార్‌ తెలిపారు. అయితే చనిపోయిందనుకున్న పిల్లి నిందితుడి వద్దకు తిరిగి రావడం గమనార్హం.