Offbeat: స్కీమ్‌ లబ్ధికి తోబుట్టువుతోనే పెళ్లి.. యూపీలో ఘటన!

లఖ్‌నవూ: ప్రభుత్వ పథకం ప్రయోజనాల కోసం ఓ వ్యక్తి తన సోదరినే వివాహం చేసుకున్న ఘటన ఇది. ఉత్తర్‌ప్రదేశ్‌ ఫిరోజాబాద్‌లోని టుండ్లాలో ఆలస్యంగా వెలుగుచూసింది. ‘ముఖ్యమంత్రి సామూహిక్ వివాహ్‌ యోజన’ లబ్ధి పొందేందుకు ఇటీవల సాంఘిక సంక్షేమశాఖ ఆధ్వర్యంలో నిర్వహించిన సామూహిక వివాహ కార్యక్రమంలో ఓ వ్యక్తి తన సోదరిని వివాహం చేసుకున్నాడు. అయితే, ఈ జంటను గ్రామస్థులు తోబుట్టువులుగా గుర్తించడంతో విషయం వెలుగులోకి వచ్చింది. ఈ పథకం కింద రాష్ట్ర ప్రభుత్వం ప్రతి జంటకు ఇంటి కానుకలతోపాటు రూ.35 వేల వరకు సాయం అందజేస్తోంది.

టుండ్లా బ్లాక్ డెవలప్‌మెంట్ ఆఫీస్ ప్రాంగణంలో శనివారం ఈ సామూహిక వివాహ కార్యక్రమం జరిగింది. ఇక్కడ 51 జంటలు పెళ్లి చేసుకున్నట్లు ఓ వార్తాసంస్థ తెలిపింది. అయితే, ఈ తోబుట్టువుల పెళ్లి విషయం తీరా అధికారుల దృష్టికి వెళ్లడంతో.. వారు అవాక్కయ్యారు! బాధ్యులపై చర్యలు తీసుకుంటామని టుండ్లా బ్లాక్ డెవలప్‌మెంట్ ఆఫీసర్ నరేష్ కుమార్ తెలిపారు. ప్రస్తుతం ఆ సోదరుడి ఆధార్ కార్డు వెరిఫై చేస్తున్నట్లు తెలిపారు. మరోవైపు పోలీసులు అతడిపై ఎఫ్ఐఆర్ నమోదు చేశారు. యూపీలో ఈ తరహా ఘటనలు ఇదే మొదటిసారి కాదు. 2018లోనూ షామ్లీలో అప్పటికే వివాహమైన 12 జంటలు మళ్లీ పెళ్లి చేసుకున్నాయి.