wheat exports: గోధుమల ఎగుమతిపై నిషేధం..సడలింపులిచ్చిన కేంద్రం

దిల్లీ: విదేశాలకు ఎగుమతి నిమిత్తం కస్టమ్ క్లియరెన్స్‌ కోసం ఎదురుచూస్తోన్న గోధుమల రవాణాకు కేంద్రం అనుమతి ఇచ్చింది. దేశీయంగా పెరుగుతున్న ధరల నియంత్రణలో భాగంగా గోధుమల ఎగుమతిపై ప్రభుత్వం ఇటీవల నిషేధం విధించింది. ఈ క్రమంలో తాజా సడలింపులపై ప్రకటన వెలువడింది. 

మే 13 లోగా కస్టమ్‌ క్లియరెన్స్ కోసం అప్పగించి, సిస్టమ్స్‌లో రిజిస్టర్‌ అయిన గోధుమల లోడును ఎగుమతి చేసేందుకు అనుమతులు ఇస్తున్నట్లు ప్రభుత్వం తాజాగా ప్రకటించింది. అంతేగాకుండా ఈజిప్టు ప్రభుత్వ అభ్యర్థన మేరకు ఆ దేశానికి ఎగుమతి చేసేందుకు అంగీకరించింది. దానికి సంబంధించి కాండ్లా పోర్టులో లోడింగ్‌ జరుగుతోందని తెలిపింది. ఎగుమతులపై నిషేధం ప్రకటనతో గోధుమలు తీసుకొచ్చిన లారీలు పోర్టుల బయట వరుసకట్టాయంటూ నివేదికలు వెలువడ్డాయి. వాటిని పరిశీలించిన కేంద్రం తాజా సడలింపులు ప్రకటించింది.

భారత్‌ ఆలోచించుకోవాలి: అమెరికా

ఇదిలా ఉంటే.. గోధుమల ఎగుమతిని నిషేధిస్తూ తీసుకున్న నిర్ణయాన్ని భారత ప్రభుత్వం పునరాలోచించుకోవాలని అమెరికా కోరుకుంటోంది. ‘భారత ప్రభుత్వ నిర్ణయం గురించి తెలిసింది. ఎగుమతులపై పరిమితులు విధించవద్దని మేం దేశాలను ప్రోత్సహిస్తున్నాం. ఎందుకంటే ఈ నిర్ణయాలు ఆహార కొరతను తీవ్రం చేస్తాయి. ఇతర దేశాల ఆందోళనను ఈ దేశాలు వింటాయని ఆశిస్తున్నాం. అలాగే వాటి నిర్ణయాలను పునరాలోచించుకుంటాయని భావిస్తున్నాం’ అంటూ అమెరికా స్పందించింది.