Indian Navy: ఇండియన్‌ నేవీలో కీలక పరిణామం.. యుద్ధనౌకపై ల్యాండ్‌ అయిన ఎంహెచ్‌-60 హెలికాప్టర్‌

దిల్లీ: భారతీయ నౌకాదళం కీలక మైలు రాయిని దాటింది. బహుళప్రయోజనకర హెలికాప్టర్‌ ఎంహెచ్‌-60.. స్వదేశీ పరిజ్ఞానంతో రూపొందించిన యుద్ధ నౌక ఐఎన్‌ఎస్‌-కోల్‌కతాపై తొలిసారి విజయవంతంగా ల్యాండ్‌ అయ్యింది. ఈ పరిణామం ఇండియన్‌ నేవీ యాంటీసబ్‌మెరైన్‌ యుద్ధ సామర్థ్యాన్ని మరింత బలోపేతం చేస్తుందని నేవీ అధికార వర్గాలు వెల్లడించాయి.

అమెరికా తయారు చేసిన ఈ ఎంహెచ్‌-60ఆర్‌ హెలికాప్టర్‌ జలాంతర్గాములపై దాడి చేయడంతోపాటు, నిఘా, యాంటీ షిప్పింగ్, పరిశోధన, రెస్క్యూ ఆపరేషన్లలో కీలకంగా వ్యవహరించే సామర్థ్యమున్నట్లు నౌకాదళం తెలిపింది. భారత నౌకాదళంలోకి ఈ హెలికాప్టర్‌ను ప్రవేశపెట్టడం ద్వారా రక్షణ రంగంలో భారత్‌ మరింత శక్తివంతంగా తయారవుతుందని పేర్కొంది. నీటి అంతర్భాగం ద్వారా పొంచి ఉన్న ప్రమాదాలను తిప్పికొట్టడంతోపాటు అత్యవసర సమయాల్లో సహాయక చర్యలు చేపట్టేందుకు ఈ హెలికాప్టర్‌ ఎంతగానో దోహదం చేస్తుందని నేవీ వెల్లడించింది. 

విదేశీ ఆయుధ ఉత్పత్తుల విక్రయాల ఒప్పందంలో భాగంగా అమెరికా ప్రభుత్వం నుంచి భారత రక్షణ శాఖ 24 ఎంహెచ్‌-60ఆర్‌ హెలికాప్టర్లను కొనుగోలు చేస్తోంది. వాటికి స్వదేశీ పరిజ్ఞానంతో తయారు చేసిన కొన్ని పరికరాలను అమర్చి తమకు అనువుగా మార్చుకుంటుంది. తొలి విడతగా 2021 జులైలో అమెరికా నుంచి 2 హెలికాప్టర్లు భారత్‌కు చేరుకోగా.. తాజాగా వాటిని ప్రయోగాత్మకంగా పరిశీలించారు.