Vande bharat: వందే భారత్‌ రైలుకు మరో ప్రమాదం.. ఈసారి ఆవు వంతు

గాంధీనగర్‌: ముంబయి- గాంధీనగర్‌ మధ్య నూతనంగా ప్రారంభమైన వందే భారత్‌ ఎక్స్‌ప్రెస్‌ రైలుకు వరుస ప్రమాదాలు జరుగుతున్నాయి. గురువారం బట్వా- మణినగర్ స్టేషన్‌ల మధ్య ఓ గేదెల గుంపును ఢీ కొనడంతో రైలు మందుభాగం దెబ్బతిన్న విషయం తెలిసిందే. తాజాగా ఇవాళ గాంధీనగర్‌ నుంచి ముంబయి వెళ్తున్న వందేభారత్‌ ఎక్స్‌ప్రెస్‌ గుజరాత్‌లోని ఆనంద్‌ స్టేషన్‌ సమీపంలో ఓ ఆవును ఢీ కొట్టింది. అయితే ఘటలో పెద్దగా నష్టమేమీ జరగలేదు. రైలు ముందుభాగంలో చిన్నపాటి గంటు ఏర్పడిందని పశ్చిమ రైల్వే చీఫ్‌ పబ్లిక్‌ రిలేషన్స్‌ అధికారి సుమిత్‌ ఠాకూర్‌ తెలిపారు. ఇవాళ సాయంత్రం 4 గంటల సమయంలో ఈ ఘటన చోటు చేసుకున్నట్లు తెలిపారు. గాంధీనగర్-ముంబయి మధ్య వందే భారత్ సెమీ- హైస్పీడ్ రైలును ప్రధాని మోదీ ఇటీవలే జెండా ఊపి లాంఛనంగా ప్రారంభించారు. అక్టోబర్‌ 1 నుంచి ఈ రైలు సేవలు ప్రయాణికులకు అందుబాటులోకి వచ్చాయి.