Viral Video: జవాన్లను చూడగానే నాలుగేళ్ల చిన్నారి ఏం చేశాడంటే..

బెంగళూరు: నాలుగేళ్ల చిన్నారి తన తండ్రితో కలిసి విమానాశ్రయానికి వచ్చాడు. తండ్రి చేయి పట్టుకుని లోపలకు నడుచుకుంటూ వెళ్తున్నాడు. ఇంతలో అక్కడ కొందరు సీఐఎస్‌ఎఫ్‌ జవాన్లు విధులు నిర్వహిస్తూ కన్పించారు. దీంతో వెళ్తున్న ఆ చిన్నారి ఒక్క క్షణం ఆగాడు. తండ్రి చేయి వదిలిపెట్టి జవాన్ల వైపు తిరిగి వారికి సెల్యూట్‌ చేశాడు. ఈ ఊహించని పరిణామంతో జవాన్లే కాదు అక్కడున్నవారంతా క్షణకాలం ఆశ్చర్యపోయారు. ఆ తర్వాత జవాన్లు కూడా చిరునవ్వుతో చిన్నారి సెల్యూట్‌ చేశారు. ఈ అద్భుత దృశ్యానికి బెంగళూరు ఎయిర్‌పోర్టు వేదికైంది.

అక్టోబరు 18న జరిగిందీ ఘటన. ఆ చిన్నారి పేరు వీర్‌ అర్జున్‌. వీర జవాన్లకు సెల్యూట్‌ చేస్తుండగా.. తన తల్లి వీడియో రికార్డ్‌ చేశారు. ఆ వీడియోను వీర్‌ తండ్రి సోషల్‌మీడియాలో పోస్ట్‌ చేయగా.. ప్రస్తుతం వైరల్‌గా మారింది. కేంద్రమంత్రి రాజీవ్‌ చంద్రశేఖర్‌ తాజాగా ఈ వీడియోను రీ-పోస్ట్‌ చేస్తూ.. చిన్నారిపై ప్రశంసలు కురిపించారు. దేశభక్తి అంటే అర్థం కూడా తెలియని వయసులో ఆ చిన్నారి చేసిన పనిని పలువురు నెటిజన్లు కొనియాడారు. చిన్న తనం నుంచే దేశభక్తిని తెలియచెబుతూ, ఇతరుల పట్ల గౌరవంగా ఉండేలా ఆ చిన్నారిని పెంచుతున్న తల్లిదండ్రులను అభినందించారు.