Punjab: ‘వాస్తవాలను నిర్ధారించుకోవాల్సి ఉంది’.. మాన్‌ వ్యవహారంపై కేంద్ర మంత్రి సింధియా

ఇంటర్నెట్‌ డెస్క్‌: ఫూటుగా తాగి ఉండటంతో పంజాబ్‌(Punjab) సీఎం భగవంత్‌ మాన్‌(Bhagwant Mann)ను జర్మనీలోని ఫ్రాంక్‌ఫర్ట్‌లో విమానం నుంచి దించేశారని ప్రతిపక్షాలు ఆరోపించిన విషయం తెలిసిందే. ఈ అంశంపై విచారణ చేపట్టాలంటూ డిమాండ్లూ వచ్చాయి. దీనిపై పౌరవిమానయానశాఖ(Civil aviation ministry) మంత్రి జ్యోతిరాదిత్య సింధియా(Jyotiraditya Scindia) మంగళవారం కీలక వ్యాఖ్యలు చేశారు. ‘ఈ వ్యవహారం విదేశీ భూభాగంపై చోటుచేసుకుంది. ఈ నేపథ్యంలో వాస్తవాలను నిర్ధారించుకోవాల్సిన అవసరం ఉంది. దీనికి సంబంధించిన వివరాలు అందజేయడం విమానయాన సంస్థ ‘లుఫ్తాన్సా(Lufthansa)’పై ఆధారపడి ఉంటుంది. నాకు వచ్చిన అభ్యర్థనల ఆధారంగా.. దాన్ని పరిశీలిస్తా’ అని అన్నారు.

‘తప్పతాగి నడవలేని స్థితిలో ఉండటంతో మాన్‌ను ఫ్రాంక్‌ఫర్ట్‌లో లుఫ్తాన్సా విమానం నుంచి దించేసినట్లు వార్తలు వచ్చాయి. ఈ వ్యవహారం కారణంగా విమానం 4 గంటలు ఆలస్యమైంది. దీంతో ఆయన ఆప్‌ జాతీయ సదస్సుకు హాజరుకాలేదు. ఈ విషయంపై  కేంద్రం జోక్యం చేసుకుని నిజానిజాలను బయటపెట్టాలి’ అని శిరోమణి అకాలీదళ్‌ నేత సుఖ్‌బీర్‌ సింగ్‌ బాదల్‌ సోమవారం డిమాండ్‌ చేశారు. ఈ అంశంపై విచారణ చేపట్టాలని కాంగ్రెస్‌ సైతం కోరింది. అయితే, ఈ ఆరోపణలను ఆప్‌ ఖండించింది. మరోవైపు.. ఫ్రాంక్‌ఫర్ట్‌కు రావాల్సిన ఒక విమానం ఆలస్యం కావడం, ఎయిర్‌క్రాఫ్ట్‌ మారాల్సి రావడం వల్లే దిల్లీ ఫ్లైట్‌ బయలుదేరడంలో 4 గంటలు జాప్యం జరిగిందని లుఫ్తాన్సా పేర్కొంది.