ఈ బడ్జెట్‌ పేదలకా? సంపన్నులకా?

రాజ్యసభలో చిదంబరం విమర్శలు

దిల్లీ: పేద ప్రజలను పక్కనబెట్టి కేవలం సంపన్న వర్గాల కోసమే బడ్జెట్‌ను రూపొందించారని కాంగ్రెస్‌ ఎంపీ చిదంబరం కేంద్ర ప్రభుత్వంపై విమర్శలు గుప్పించారు. రాజ్యసభలో బడ్జెట్‌పై చర్చ సందర్భంగా ఆయన నేడు మాట్లాడారు. పేదలకు ఎలాంటి హామీ ఇవ్వని ఈ బడ్జెట్‌ను తాము తిరస్కరిస్తున్నట్లు చెప్పారు. 

‘‘ప్రభుత్వ విధానాలు, కరోనా మహమ్మారి వల్ల దేశంలో 12కోట్ల మందికి పైగా ఉపాధి కోల్పోయారు. 35శాతం ఎంఎస్‌ఎంఈలు మూతబడ్డాయి. వెనుకబడిన రాష్ట్రాల్లో పరిస్థితి మరింత అధ్వాన్నంగా ఉంది. ఈ సమస్యలకు ఒకటే పరిష్కారం.. నిపుణులు, ఆర్థికవేత్తల నుంచి విలువైన సలహాలు తీసుకుని వ్యవస్థీకృత సమస్యలను పరిష్కరించాలి. కానీ, ప్రభుత్వం ఏం చేసింది. పేదలు, నిరుద్యోగులను నిర్లక్ష్యం చేసింది. అలాంటప్పుడు ఈ బడ్జెట్‌ ఎవరికోసం రూపొందించారు? ఇది కేవలం సంపన్నుల కోసం సంపన్నులు తయారుచేసిన బడ్జెట్‌ మాత్రమే. పేదలకు ఎలాంటి సహకారం ఇవ్వలేని ఈ పద్దును మేం తిరస్కరిస్తున్నాం’’ అని చిదంబరం తెలిపారు. 

ఫిబ్రవరి 1న ఆర్థిక మంత్రి నిర్మలా సీతారామన్‌ పార్లమెంట్‌ను బడ్జెట్‌ను ప్రవేశపెట్టారు. ఈ బడ్జెట్‌పై ఉభయ సభల్లోనూ చర్చ జరుగుతోంది. శుక్రవారం ఆర్థికమంత్రి సీతారామన్‌.. రాజ్యసభలో విపక్షాల ప్రశ్నలపై సమాధానమివ్వనున్నారు. ఆ తర్వాత రాజ్యసభను మార్చి 8కి వాయిదా వేయనున్నారు. శనివారం లోక్‌సభలోనూ రిప్లై ఇచ్చిన అనంతరం ఆ సభ కూడా వాయిదా పడనుంది. 

నిజానికి బడ్జెట్‌ తొలి విడత సమావేశాలు ఈ నెల 15 వరకు జరగాల్సి ఉండగా.. రెండు రోజుల ముందుగానే వాయిదా పడే అవకాశాలు కన్పిస్తున్నాయి. తిరిగి మార్చి 8 నుంచి రెండో విడత సమావేశాలు జరగనున్నాయి.

ఇవీ చదవండి..

చైనాకు అంగుళం భూమి కూడా ఇవ్వం

స్వేచ్ఛనిచ్చాం.. కానీ చట్టాలను పాటించాల్సిందే