Delta plus: ‘డెల్టాప్లస్‌’పై రాహుల్‌ 3 ప్రశ్నలు

దిల్లీ: దేశంలో కరోనా రెండో దశ ఉద్ధృతి తగ్గుముఖం పడుతున్న సమయంలో ‘డెల్టా ప్లస్‌’ వేరియంట్‌ వ్యాప్తి ఆందోళన కలిగిస్తోంది. ఇప్పటికే ఈ వేరియంట్‌ను కేంద్రం ‘ఆందోళనకర రకం’గా పేర్కొనడం, దీని కారణంగా మూడో దశ ముప్పు రావొచ్చని నిపుణులు హెచ్చరించడం కలవరపెడుతోంది. ఈ నేపథ్యంలో ‘డెల్టా ప్లస్‌’ వ్యాప్తిపై కాంగ్రెస్‌ అగ్రనేత రాహుల్‌గాంధీ ట్విటర్‌ వేదికగా స్పందించారు. ఈ రకాన్ని అరికట్టేందుకు ప్రభుత్వం ఎలాంటి చర్యలు చేపడుతోందో చెప్పాలంటూ కేంద్రానికి మూడు ప్రశ్నలు సంధించారు. 

‘‘డెల్టా ప్లస్‌ వేరియంట్‌పై మోదీ ప్రభుత్వానికి ప్రశ్నలు:

1. ఈ వైరస్‌ను గుర్తించి, వ్యాప్తిని అరికట్టేందుకు విస్తృత పరీక్షలు ఎందుకు నిర్వహించడం లేదు?

2. ఈ వేరియంట్‌పై వ్యాక్సిన్లు ఎంత సమర్థంగా పనిచేస్తాయి, దీనిపై పూర్తి సమాచారం ఎప్పటికి తెలుస్తుంది?

3. మూడో దశ ఉద్ధృతిలో ఈ వేరియంట్‌ను నియంత్రించేందుకు ప్రణాళికలేంటీ?’’ అని రాహుల్‌ ప్రశ్నించారు.

దేశంలో డెల్టా ప్లస్‌ వేరియంట్‌ వ్యాప్తి నానాటికీ పెరుగుతోంది. ఇప్పటికే మహారాష్ట్ర, మధ్యప్రదేశ్‌ సహా పలు రాష్ట్రాల్లో ఈ రకం కేసులు వెలుగుచూస్తుండగా.. మరణాలు కూడా సంభవించినట్లు తెలుస్తోంది. దీంతో అప్రమత్తమైన కేంద్ర ప్రభుత్వం.. ఆయా రాష్ట్రాలకు అడ్వయిజరీలు జారీ చేసింది. మరోవైపు ఈ వేరియంట్‌ సంక్రమణ వేగం, తీవ్రత దృష్ట్యా దీన్ని ఆందోళనకర రకంగా ప్రకటిస్తున్నట్లు కేంద్ర ఆరోగ్యశాఖ ఇటీవల వెల్లడించింది.