Sanjay Raut: వైన్‌ అనేది మద్యం కాదు.. శివసేన ఎంపీ కీలక వ్యాఖ్యలు

ముంబయి: మహారాష్ట్రలోని సూపర్‌ మార్కెట్‌లు, వాక్‌-ఇన్‌ స్టోర్‌లలో వైన్‌ విక్రయాలకు అనుమతించాలన్న ప్రతిపాదనను రాష్ట్ర ప్రభుత్వం తాజాగా ఆమోదించింది. ఈ నిర్ణయంపై శివసేన ఎంపీ సంజయ్‌ రౌత్‌ శుక్రవారం కీలక వ్యాఖ్యలు చేశారు. ‘వైన్ అనేది మద్యం కాదు. వైన్ విక్రయాలు పెరిగితే.. రైతులు దాన్నుంచి ప్రయోజనం పొందుతారు. వారి ఆదాయాన్ని రెట్టింపు చేసేందుకు ఈ చర్యలు తీసుకున్నామ’ని వెల్లడించారు. మరోవైపు ఈ విషయమై భాజపా నేతల విమర్శలను ఉద్దేశించి రౌత్‌ మాట్లాడుతూ.. ‘భాజపా కేవలం వ్యతిరేకతను మాత్రమే ప్రదర్శిస్తుంది. కానీ, రైతులకు ఏం చేయదు. ఈ పార్టీ.. పబ్లిక్‌ సెక్టార్‌ను విక్రయించిందని కాంగ్రెస్‌ సీనియర్‌ నేత మల్లికార్జున్ ఖర్గే అన్నది నిజమేన’ని అన్నారు.

రూ.5 వేల వార్షిక లైసెన్సింగ్‌ రుసుంతో రాష్ట్రవ్యాప్తంగా సూపర్ మార్కెట్‌లు, వాక్-ఇన్ స్టోర్లలో వైన్‌ విక్రయాలకు అనుమతివ్వాలనే ప్రతిపాదనను మహారాష్ట్ర ప్రభుత్వ గురువారం ఆమోదించింది. దేశీయ వైన్‌ ఉత్పత్తిదారుల కోసం మార్కెటింగ్ వ్యవస్థను మరింత విస్తృతం చేసేందుకు ఈ నిర్ణయం తీసుకున్నట్లు రాష్ట్ర కేబినెట్‌ వెల్లడించింది. అయితే, ఈ నిర్ణయంపై భాజపా నుంచి వ్యతిరేకత వ్యక్తమవుతోంది. రాష్ట్రంలోని మహావికాస్‌ అఘాడీ ప్రభుత్వం.. మహారాష్ట్రను ‘మద్య రాష్ట్ర’గా మార్చాలని చూస్తోందని మాజీ ముఖ్యమంత్రి దేవేంద్ర ఫడణవీస్‌ విమర్శలు కురిపించారు.