Corona virus: ఊపిరి పీల్చుకుంటున్న మహారాష్ట్ర.. అతి తక్కువ కేసులు నమోదు

ముంబయి: కరోనా మహమ్మారి నుంచి మహారాష్ట్ర క్రమంగా బయటపడుతోంది. గత 24 గంటల వ్యవధిలో రాష్ట్రవ్యాప్తంగా కేవలం 899 కొత్త కేసులు నమోదయ్యాయి. గతేడాది మార్చి తర్వాత అతి తక్కువ కేసులు నమోదు కావడం ఇదే మొదటిసారి. 14 జిల్లాల్లో ఒక్క కేసు కూడా నమోదు కాలేదు. 12 జిల్లాల్లో కేసులు సింగిల్‌ డిజిట్‌కే పరిమితమయ్యాయి. ముంబయి, ఠాణె, పుణె, రత్నగిరి జిల్లాల్లోనే 12 మరణాలు వెలుగుచూశాయి. దీంతో మరణాల రేటు 2.12 శాతానికి పడిపోయింది. సోమవారం మొత్తం 1,586 మంది డిశ్ఛార్జి అయ్యారు. ప్రస్తుతం రాష్ట్రంలో రికవరీ రేటు 97.47 శాతంగా ఉంది. కాగా మహారాష్ట్రలో మొత్తం కేసుల సంఖ్య 66,02,961కు చేరుకుంది. 1.40 లక్షల మంది మృతి చెందినట్లు రాష్ట్ర ఆరోగ్య శాఖ తెలిపింది.

హిమాచల్‌లో 556 మంది విద్యార్థులకు పాజిటివ్‌

పలు రాష్ట్రాల్లో కొవిడ్‌ కేసులు తగ్గుతుండగా.. మరికొన్ని రాష్ట్రాల్లో కేసులు పెరగడం ఆందోళన కలిగిస్తోంది. హిమాచల్‌ ప్రదేశ్‌లో ఒక్క నెలలోనే 556 మంది విద్యార్థులకు పాజిటివ్‌గా తేలింది. సెప్టెంబర్‌ 27 నుంచి అక్టోబర్‌ 25 వరకు ప్రభుత్వ, ప్రైవేటు పాఠశాలల్లో ఈ కేసులు నమోదైనట్లు ఆ రాష్ట్ర ఆరోగ్య శాఖ అధికారులు వెల్లడించారు. హామిర్‌పుర్‌ జిల్లాలో అత్యధికంగా 196 కేసులు, కాంగ్రాలో 173, ఉనాలో 104 మంది విద్యార్థులు వైరస్‌ బారిన పడ్డారు. అయితే ఈ 556 మందిలో ఇప్పటివరకు 250 మంది కోలుకోగా.. హామిర్‌పుర్‌కు చెందిన 13 ఏళ్ల విద్యార్థిని మృతిచెందింది. మిగతా 305 మంది చికిత్స పొందుతున్నారు.