China Xi Jinping: పిల్లలకు చైనా అధ్యక్షుడు షీ జిన్‌పింగ్‌ పాఠాలు!

బీజింగ్‌ (Beijing): చైనా (China)లో పిల్లలకు ఇక నుంచి షీజిన్‌పింగ్‌ (Xi jinping) భావజాలాన్ని నూరిపోయనున్నారు. ‘షీజిన్‌పింగ్‌ ఆలోచన’పై పాఠాలు పిల్లల్లో మార్క్సిస్టు భావజాలాన్ని పెంపొందిస్తాయని ఆ దేశ విద్యాశాఖ ఒక ప్రకటనలో పేర్కొంది. ప్రాథమిక పాఠశాల స్థాయి నుంచి విశ్వవిద్యాలయాల వరకు ఉన్న విద్యావిధానంలోకి ఈ బోధనలను చొప్పించారు. లేబర్‌ ఎడ్యుకేషన్‌, ఎడ్యుకేషన్‌ ఆన్‌ నేషనల్‌ సెక్యూరిటీలో కూడా ఈ పాఠాలు (Xi jinping Lessons) ఉంటాయి. ‘‘దేశం, సీసీపీ, సోషలిజంపై ప్రజల్లో ప్రేమను పెంపొందించే అంశాలపై ప్రాథమిక పాఠశాలలు దృష్టిపెట్టాలి. మధ్యస్థాయి పాఠశాలల్లో విద్యార్థులు రాజకీయ ప్రభావిత నిర్ణయాలు, అభిప్రాయాల నుంచి రక్షించేలా విజ్ఞానం, గ్రహణ శక్తిపై దృష్టిపెట్టాలి’’ అని గ్లోబల్‌టైమ్స్‌ పేర్కొంది.

చైనా కమ్యూనిస్టు పార్టీ (CCP) పట్టును విద్యావ్యవస్థపై కూడా పెంచేందుకు ఈ వ్యూహాన్ని అనుసరిస్తున్నట్లు సమాచారం. ‘షీజిన్‌పింగ్‌ థాట్‌’లో మొత్తం 14 సూత్రాలు ఉంటాయి. కొత్త ఆలోచనల అభివృద్ధి, సంపూర్ణ మార్పు, ప్రకృతి, మనిషి కలిసి జీవించడం, సైన్యంపై కమ్యూనిస్టు పార్టీ పట్టు, వన్‌ కంట్రీ టూ సిస్టమ్స్‌, మాతృభూమితో  పునరేకీకరణ వంటి అంశాలు ఉంటాయి.