Presidential Election: నామినేషన్ వేసిన విపక్షాల ఉమ్మడి అభ్యర్థి యశ్వంత్ సిన్హా

దిల్లీ: రాష్ట్రపతి ఎన్నిక(Presidential Election)లో విపక్షాల ఉమ్మడి అభ్యర్థిగా పోటీపడుతోన్న యశ్వంత్ సిన్హా(Yashwant Sinha) సోమవారం నామినేషన్ వేశారు. దిల్లీలోని పార్లమెంట్ భవనంలో రిటర్నింగ్ అధికారి అయిన రాజ్యసభ సెక్రటరీ జనరల్ పీసీ మోదీకి ఈ నామినేషన్ పత్రాలను సమర్పించారు. అలాగే నాలుగు సెట్ల నామినేషన్ పత్రాలను అందించారు. ఈ సమయంలో ఆయన వెంట కాంగ్రెస్‌ అగ్రనేత రాహుల్ గాంధీ, ఎన్‌సీపీ అధినేత శరద్‌పవార్, ఎస్పీ చీఫ్ అఖిలేశ్ యాదవ్, ఎన్‌సీ అధినేత ఫరూక్ అబ్దుల్లా, తెరాస కార్యనిర్వాహక అధ్యక్షుడు కేటీఆర్‌తోపాటు పలువురు విపక్షనేతలు ఉన్నారు.

యశ్వంత్ సిన్హా అభ్యర్థిత్వానికి చివరి నిమిషంలో తెరాస మద్దతు ప్రకటించింది. ఈ ఉదయం ఆ మేరకు ప్రకటన చేసింది. కాంగ్రెస్‌తో కలిసి వెళ్లే విషయం, అభ్యర్థిని ఎంచుకునే విషయంలో అసంతృప్తిగా ఉన్నప్పటికీ.. చివరకు విపక్షాలతో కలిసి వెళ్లాలని నిర్ణయించుకుంది. దానిలో భాగంగా ఈ నామినేషన్ కార్యక్రమానికి కేటీఆర్ హాజరయ్యారు. ఇదిలా ఉంటే.. ఆమ్‌ఆద్మీ పార్టీ, ఝార్ఖండ్ ముక్తిమోర్చా పార్టీలు మాత్రం తమ ప్రతినిధులను పంపలేదు. బీఎస్పీ, బీజేడీ ఇప్పటికే ఎన్డీయే అభ్యర్థి ద్రౌపదీ ముర్మూకు తమ మద్దతును ప్రకటించిన సంగతి తెలిసిందే.

ఇదిలా ఉండగా.. ఎన్డీయే తరఫున రాష్ట్రపతి అభ్యర్థి ద్రౌపదీ ముర్మూ శుక్రవారం అట్టహాసంగా నామినేషన్ వేశారు. ఆ సమయంలో ప్రధాని మోదీ, కేంద్రమంత్రులు, భాజపా, ఎన్డీయే పాలిత రాష్ట్రాల ముఖ్యమంత్రులు ఆమె వెంట ఉన్నారు. తగినంత సంఖ్యా బలం ఉండటంతో ఆమె గెలుపు దాదాపు ఖాయంగా కనిపిస్తోంది. అయితే సిన్హా వెంట విపక్ష అగ్రనేతల కలిసి రావడం.. ఆ పార్టీలు తమ ఐక్యతను చాటే ఎత్తుగడ అని విశ్లేషకులు అంటున్నారు.