రవితేజే న్యాయం చేయగలరు

‘‘ఖిలాడి’ చిత్రంతో ప్రేక్షకులు ఓ సరికొత్త రవితేజను చూస్తార’’న్నారు దర్శకుడు రమేష్‌ వర్మ. ‘రాక్షసుడు’ వంటి విజయం తర్వాత ఆయన నుంచి వస్తున్న కొత్త చిత్రమిది. రవితేజ కథానాయకుడు. మీనాక్షి చౌదరి, డింపుల్‌ హయాతి కథానాయికలు. ప్రస్తుతం నిర్మాణాంతర కార్యక్రమాలు జరుపుకొంటోంది. ఆదివారం రమేష్‌ వర్మ పుట్టినరోజు. ఈ సందర్భంగా శనివారం విలేకర్లతో చిత్ర విశేషాలు పంచుకున్నారు రమేష్‌ వర్మ. ఆ సంగతులు ఆయన మాటల్లోనే...

‘‘ఇదొక విభిన్నమైన యాక్షన్‌ థ్రిల్లర్‌. జీవితంలో అందరికీ డబ్బు చాలా ముఖ్యం. అయితే జీవితంలో డబ్బుకే ప్రాధాన్యం ఇవ్వాలా..? భావోద్వేగాలకు ఇవ్వాలా..? రెండూ ముఖ్యమా? అని ఆలోచింపజేసేలా రెండు పాత్రలుంటాయి. ఆ పాత్రల కథే ఈ ‘ఖిలాడి’ సినిమా. ఈ కథ అనుకున్నప్పుడే దీనికి రవితేజ అయితేనే న్యాయం చేయగలరనిపించింది. రాక్షసుడు’ చిత్రీకరణ సమయంలోనే ఆయనకు ఈ కథ చెప్పా. విన్న వెంటనే చేసేద్దామన్నారు. ఇందులో రవితేజ చాలా కొత్తగా కనిపిస్తారు. ఆయన ద్విపాత్రాభినయం చేశారా..? త్రిపాత్రాభినయమా? అన్నది తెరపైనే చూడాలి. దాదాపు రూ.65కోట్లు ఖర్చుతో భారీగా రూపొందించాం. టెక్నికల్‌గా ఎంతో ఉన్నత స్థాయిలో ఉంటుంది’’.

* ‘‘ఖిలాడి’ మరే చిత్రానికి రీమేక్‌ కాదు. మేము ఈ సినిమా అనుకున్నాక.. ఇలాంటి కాన్సెప్ట్‌తోనే తమిళంలో ఓ చిత్రం మొదలైందని తెలిసింది. ఎందుకైనా మంచిదని ఆ చిత్ర హక్కులు కొని ఉంచాం. కొవిడ్‌ పరిస్థితుల వల్లే ఈ చిత్రం ఆలస్యమైంది. ఫలితంగా బడ్జెట్‌  కాస్త పెరిగింది. ప్రస్తుతం మూడు పాటలు మినహా చిత్రీకరణ పూర్తయింది. మిగిలిన పనులు పూర్తి చేసి, త్వరలో విడుదల తేదీ ప్రకటిస్తాం. నేను ప్రస్తుతం   దర్శకుడు మారుతితో కలిసి ఓ సినిమా నిర్మించేందుకు సిద్ధమవుతున్నా. ఓ ముఖ్య పాత్రలో వరలక్ష్మి శరత్‌ కుమార్‌ నటిస్తుంది. సరైన సమయంలో ‘రాక్షసుడు 2’ని సెట్స్‌పైకి తీసుకెళ్తాం. దీన్ని భారీ బడ్జెట్‌తో పాన్‌ ఇండియా సినిమాలా రూపొందించనున్నాం. ఈ చిత్రం కోసం విజయ్‌  సేతుపతితో మాట్లాడాం. ఆయన నిర్ణయం తెలియాల్సి ఉంది’’.