రాజశేఖర్‌ సందడి షురూ

ఇటీవల కాలంలో థ్రిల్లర్‌ చిత్రాలకు చిరునామాగా నిలుస్తున్నారు కథానాయకుడు రాజశేఖర్‌. ఇప్పుడీ క్రమంలోనే ఆయన నుంచి రానున్న కొత్త సినిమా ‘శేఖర్‌’. మ్యాన్‌ విత్‌ ద స్కార్‌.. అనేది ఉపశీర్షిక. లలిత్‌ దర్శకుడు. ఎమ్‌.ఎల్‌.వి.సత్యనారాయణ, శివాని, శివాత్మిక, వెంకట శ్రీనివాస్‌ బొగ్గరం సంయుక్తంగా నిర్మిస్తున్నారు. అను సితార, ముస్కాన్‌ కుబ్‌ చాందిని కథానాయికలు. రెండో దశ కరోనా పరిస్థితులతో ఆగిన ఈ సినిమా చిత్రీకరణ.. బుధవారం నుంచి అరకులో ప్రారంభమైంది. ప్రస్తుతం రాజశేఖర్‌తో పాటు నాయిక అను, ఇతర ప్రధాన తారాగణంపై కీలక సన్నివేశాలు చిత్రీకరిస్తున్నారు. నిర్మాతలు మాట్లాడుతూ ‘‘రాజశేఖర్‌ నటిస్తున్న 91వ చిత్రమిది. విభిన్నమైన థ్రిల్లర్‌ కథాంశంతో రూపొందుతోంది. ఈ నెలాఖరు వరకు అరకులోనే చిత్రీకరణ కొనసాగుతుంది. ఈ షెడ్యూల్‌తో 75శాతం చిత్రీకరణ పూర్తవుతుంది. తర్వాత హైదరాబాద్‌లో ఐదు రోజులు చిత్రీకరణ జరిపి.. శ్రీశైలం లేదా నాగార్జున సాగర్‌లో వారం షెడ్యూల్‌ ప్లాన్‌ చేస్తాం’’ అన్నారు. సంగీతం: అనూప్‌ రూబెన్స్‌.