మహేశ్‌భట్‌ నన్ను వేధించాడు: నటి

ఇండస్ట్రీకి ఆయన పెద్ద డాన్‌

ముంబయి‌: బాలీవుడ్‌లో పేరుపొందిన నిర్మాత మహేశ్‌భట్‌ తనని వేధింపులకు గురి చేశాడంటూ నటి లువియానా లోధ్ ఆరోపణలు చేశారు. ఆయన నుంచి తనకి ప్రమాదం ఉందని ఆమె పేర్కొన్నారు. మహేశ్‌భట్‌ బంధువు సుమిత్‌ సబర్వాల్‌ను వివాహం చేసుకున్న లువియానా ఇటీవల విడాకుల కోసం కోర్టును ఆశ్రయించారు. ఈ నేపథ్యంలోనే మహేశ్‌భట్‌పై పలు ఆరోపణలు చేస్తూ తాజాగా ఆమె ఇన్‌స్టా వేదికగా ఓ వీడియో విడుదల చేశారు.

దాదాపు 2 నిమిషాల నిడివిగల ఈ వీడియోలో ఆమె మహేశ్‌భట్‌ గురించి ఎన్నో విషయాలు తెలియజేశారు. ‘మహేశ్‌భట్‌ బంధువు సుమిత్‌ సబర్వాల్‌ను కొంతకాలం క్రితం నేను వివాహం చేసుకున్నాను. పలువురు హీరోయిన్లకు సుమిత్‌ మాదకద్రవ్యాలు సరఫరా చేస్తాడనే విషయం తెలియడంతో ఇటీవల విడాకులు కోరుతూ కోర్టును ఆశ్రయించాను. ఈ విషయాలన్నీ మహేశ్‌భట్‌కి తెలుసు. సినీ పరిశ్రమకు ఆయన‌ ఓ పెద్ద డాన్‌. పరిశ్రమకు చెందిన ప్రతిదీ ఆయన చేతుల్లోనే ఉంటుంది. ఒకవేళ ఆయన చెప్పినట్లు వినకపోతే.. ఎదుటివారి జీవితాలను కష్టాల్లోపడేస్తాడు. ఆయన మాట విననందుకు పని లేకుండా చేసి ఎంతోమంది జీవితాలను నాశనం చేశాడు. ఆయన ఒక్క ఫోన్‌ కాల్‌ చేస్తే చాలు ఉద్యోగాలు కోల్పోతారు. మా ఇంటి నుంచి నన్ను బయటకు వెళ్లగొట్టాలని చూశాడని పేర్కొంటూ ఆయనపై గతంలో వేధింపుల కేసు నమోదు చేశాను. కానీ పోలీసులు మాత్రం పట్టించుకోలేదు. నాతోపాటు నా కుటుంబ భద్రత కోసమే ఈ వీడియో పోస్ట్‌ చేస్తున్నాను. ఒకవేళ నాకు, నా కుటుంబానికి ఏదైనా జరగరానిది జరిగితే దానికి కారణం మహేశ్‌భట్‌, ముఖేష్‌భట్‌, సుమిత్‌ సబర్వాల్‌, సాహెల్‌ సెహగల్‌, కుంకుమ్‌ సెహగల్‌’ అని నటి లువియానా లోధ్ ఆరోపించారు.