Ajith: అజిత్‌ మరోసారి

తమిళ కథానాయకుడు అజిత్‌... కొద్దిమంది దర్శకులతో వరుసగా సినిమాలు చేస్తుంటారు. మొన్నటిదాకా దర్శకుడు శివతో కలిసి ‘వేదాలం’, ‘వివేగం’, ‘విశ్వాసం’... ఇలా వరుసగా సినిమాలు చేశారు. ఇప్పుడు హెచ్‌.వినోద్‌తో అలాంటి ప్రయాణమే చేస్తున్నారు. ‘నెర్కొండ పార్వై’తో విజయాన్ని అందుకున్న ఈ జోడీ, ఆ వెంటనే ‘వలిమై’ కోసం జట్టు కట్టారు. ఇప్పుడు ముచ్చటగా మూడో చిత్రం కోసం రంగంలోకి దిగుతున్నారు. బోనీకపూర్‌ నిర్మించనున్న ఆ సినిమా హైదరాబాద్‌లోనే ఆరంభం కానుంది. ఇందులో మరో ముఖ్యమైన పాత్ర కోసం మలయాళ నటుడు మోహన్‌లాల్‌తోపాటు, తెలుగు కథానాయకుడు నాగార్జున పేర్లని పరిశీలించారు. ఎవరు ఖరారవుతారో తెలియదు కానీ.. ఈ సినిమా మరో ఆసక్తికరమైన కథతో రూపొందుతున్నట్టు సమాచారం.