విజయ్‌ నిర్మాతకు బన్నీ అభినందన..!

స్టైలిష్‌స్టార్‌ మెచ్చిన చిత్రమిది

హైదరాబాద్‌: విజయ్‌ దేవరకొండ కథానాయకుడిగా, సుకుమార్‌ దర్శకత్వంలో ఓ సినిమా తెరకెక్కనున్న విషయం తెలిసిందే. అయితే ఈ సినిమాతో నిర్మాతగా తొలి అడుగులు వేస్తోన్న తన స్నేహితుడు కేదార్‌ సెలగంశెట్టిని అల్లు అర్జున్‌ అభినందించారు. ఈ మేరకు కేదార్‌ని శుక్రవారం ఉదయం తన నివాసానికి ఆహ్వానించారు. నిర్మాతగా కేదార్‌ ఎన్నో విజయాలు అందుకోవాలని ఆకాంక్షించారు. అనంతరం ఆయనకి ఓ మొక్కను బహుమతిగా అందించారు. బన్నీ నుంచి శుభాకాంక్షలు పొందడం తనకెంతో సంతోషంగా ఉందని కేదార్‌ తెలిపారు.

కాగా, ఈ ఏడాది ఆరంభంలో విడుదలైన ‘పలాస 1978’ చిత్రం తనకెంతగానో నచ్చిందని బన్నీ తెలిపారు. ఈ మేరకు సదరు చిత్ర దర్శకుడు కరుణ కుమార్‌ని ప్రశంసించారు. శుక్రవారం తన నివాసానికి ఆహ్వానించి అభినందనలు తెలిపారు. దీనికి సంబంధించిన ఫొటోని బన్నీ ట్విటర్‌ వేదికగా షేర్‌ చేశారు. ‘తాజాగా నేను ‘పలాస 1978’ చిత్రాన్ని వీక్షించాను. ఈ సినిమా నాకు వ్యక్తిగతంగా బాగా నచ్చింది. ఈ మేరకు చిత్ర దర్శకుడు కరుణ కుమార్‌ని కలిసి అభినందించాను. గొప్ప సందేశంతో మంచి చిత్రాన్ని తెరకెక్కించారు. ఈ చిత్రంలో ఎన్నో మంచి విషయాలున్నాయి. టాలెంట్‌ ఉన్న నూతన దర్శకులు, నటీనటులు తెలుగు పరిశ్రమలోకి వస్తున్నందుకు సంతోషంగా ఉంది. చిత్రబృందం మొత్తానికి నా హృదయపూర్వక శుభాకాంక్షలు’ అని బన్నీ పేర్కొన్నారు.