అంతా దగ్గరే ఉన్నా..ఇంకా దూరమే: అమితాబ్‌

ముంబయి: కరోనా నుంచి కోలుకోని ఇంటికి చేరుకున్న బాలీవుడ్ సూపర్‌ స్టార్‌ అమితాబ్‌ బచ్చన్‌కు హోం క్వారంటైన్‌ సరిపడటం లేదు. ఈ వయసులో కూడా చురుగ్గా ఉండే ఆయనకు ఒక దగ్గరే పరిమితమై, ఏకాంతంలో ఉండటం.. జైల్లో ఉన్నట్లుగా అనిపిస్తోందట. ఈ క్వారంటైన్‌ లైఫ్ అనుభవాలను తాజాగా బ్లాగ్‌లో పంచుకున్నారు. ‘సొంత ఇంటిలో ఏకాంతం.. ఇంట్లో వారిని కలుసుకోలేకపోవడం.. జైల్లో వారిని పలకరించినట్లు పత్ర్యేక సమయాలు.. తరచూ సినిమాలు చూడటం.. అడ్డుగా గ్లాస్‌ తెర.. ఫోన్‌ సంభాషణలు, చేతుల సైగలతోనే అంతా జరుగుతోంది. కొన్ని అంగుళాల దూరంలోనే కుటుంబం ఉన్నా..ఇంకా దూరమే’ అంటూ బ్లాగ్‌లో కవితాత్మకంగా ఆయన పరిస్థితిని చెప్పుకొచ్చారు. అలాగే రక్షాబంధన్‌ సందర్భంగా రాఖీలు అందాయని, దానికి సంబంధించిన చిత్రాన్ని ఇన్‌స్టాగ్రాంలో షేర్‌ చేశారు.