రజనీ ఆరోగ్యంపై మరో హెల్త్‌ బులెటిన్‌

హైదరాబాద్‌: అగ్ర కథానాయకుడు రజనీకాంత్‌ ఆరోగ్యం నిలకడగా ఉందని అపోలో వైద్యులు తెలిపారు. రక్తపోటులో హెచ్చు తగ్గుల కారణంగా చికిత్స నిమిత్తం రజనీ ఆస్పత్రిలో చేరిన సంగతి తెలిసిందే. ఈ నేపథ్యంలో శనివారం సాయంత్రం అపోలో ఆస్పత్రి వర్గాలు ఆయన ఆరోగ్యంపై హెల్త్‌ బులెటిన్‌ విడుదల చేశాయి.

‘‘రజనీకాంత్‌ ఆరోగ్యం నిలకడగా ఉంది. కొన్ని వైద్య పరీక్షల నివేదికలు రావాల్సి ఉంది. ఇప్పటివరకూ చేసిన వైద్య పరీక్షల్లో ఎలాంటి ఆందోళన లేదు. వైద్య పరీక్షల నివేదికలు చూసి రేపు రజనీకాంత్‌ను డిశ్ఛార్జి చేస్తాం’’ -అపోలో ఆస్పత్రి వర్గాలు

తమిళ సినిమా ‘అన్నాత్తే’ సినిమా షూటింగ్‌ కోసం ఈ నెల 13న హైదరాబాద్‌కు రజనీ వచ్చారు. నిత్యం షూటింగ్‌లో పాల్గొంటున్నారు. ఈ నెలాఖరుకల్లా షెడ్యూల్‌ ముగియనుంది. ఇటీవల సెట్‌లో నలుగురికి కొవిడ్‌ రావడంతో దర్శకుడు శివ షూటింగ్‌ నిలిపివేశారు. ముందు జాగ్రత్తగా ఈనెల 22న రజనీకాంత్‌ కూడా కరోనా పరీక్షలు చేయించుకోగా నెగెటివ్‌ వచ్చింది. అప్పటి నుంచి స్వీయ నిర్బంధంలో ఉంటున్నారు. ఇంతలో శుక్రవారం ఉదయం ఒక్కసారిగా అనారోగ్యం తలెత్తడంతో వెంటనే అపోలో ఆసుపత్రిలో చేరారు.