Jagapathibabu: ‘గోపిచంద్‌ 30’ కోసం..

గోపిచంద్‌ హీరోగా శ్రీవాస్‌ దర్శకత్వంలో ఓ చిత్రం రూపొందుతోంది. ‘లక్ష్యం’, ‘లౌక్యం’ వంటి విజయాల తర్వాత ఈ ఇద్దరి కాంబినేషన్‌లో వస్తున్న మూడో సినిమా ఇది. టీజీ విశ్వప్రసాద్‌ నిర్మాత. ఈ చిత్రంలో నటుడు జగపతిబాబు ఓ కీలక పాత్రలో కనిపించనున్నారు. శనివారం ఆయన పుట్టినరోజు సందర్భంగా చిత్ర బృందం ఈ విషయాన్ని  అధికారికంగా ప్రకటించింది. ‘‘గోపిచంద్‌ నటిస్తున్న 30వ చిత్రమిది. ఆయన శైలికి తగ్గట్లుగా సాగే ఆసక్తికర కథాంశంతో రూపొందుతోంది. ఈ సినిమాలో గోపిచంద్‌ సరికొత్తగా కనిపించనున్నారు. మరిన్ని విషయాలు త్వరలో తెలియజేస్తామ’’ని దర్శక నిర్మాతలు తెలియజేశారు. ఈ సినిమాకి మిక్కీ జే మేయర్‌ స్వరాలందిస్తున్నారు. వెట్రీ పళనిస్వామి ఛాయాగ్రాహకుడిగా వ్యవహరిస్తున్నారు.