Katrina Kaif: కెమెరా... యాక్షన్‌... ‘మెర్రీ క్రిస్మస్‌’

విక్కీ కౌశల్‌తో పెళ్లి తర్వాత శుక్రవారమే కొత్త ప్రాజెక్టులోకి అడుగుపెట్టింది కత్రినా కైఫ్‌. తమిళ కథానాయకుడు విజయ్‌ సేతుపతితో కలిసి ఆమె నటిస్తున్న చిత్రం ‘మెర్రీ క్రిస్మస్‌’. శ్రీరామ్‌ రాఘవన్‌ దర్శకుడు. ఈ సినిమా చిత్రీకరణ శుక్రవారం ప్రారంభమైంది. ఈ మేరకు సామాజిక మాధ్యమాల్లో క్లాప్‌బోర్డ్‌ ఫొటోను పంచుకుంది కత్రిన. ఈ సందర్భంగా ఆమె మాట్లాడుతూ..‘‘విజయ్‌ సేతుపతి వంటి నటుడు, శ్రీరామ్‌ రాఘవన్‌ వంటి దర్శకుడు చేస్తున్న ఈ చిత్రంలో నేను భాగం కావడం అదృష్టంగా భావిస్తున్నా. ఈ సినిమా కోసం ఎంతో ఉత్సాహంగా ఎదురుచూసిన క్షణం వచ్చేసింది’’ అన్నారు. దీని షూటింగ్‌ కోసం విజయ్‌సేతుపతి వచ్చే వారమే ముంబయికి రానున్నారు. ఈ ఏడాది క్రిస్మస్‌ సందర్భంగా డిసెంబర్‌ 23న సినిమాని ప్రేక్షకుల ముందుకు తేవాలని చిత్రబృందం యోచిస్తోంది. ప్రస్తుతం కత్రిన ‘ఫోన్‌ భూత్‌’ తదితర చిత్రాల్లో నటిస్తోంది.