మహేశ్‌-నమ్రతలను కలిపిన చిత్రానికి 20ఏళ్లు

అలా మొదలైంది!

‘వంశీ’ చిత్రీకరణ కోసం న్యూజిలాండ్‌ వెళ్లింది చిత్ర బృందం. అక్కడ సుమారు 25 రోజులు షూటింగ్‌ చేశారు. అప్పటివరకూ నమ్రత అన్ని రోజులు అవుట్‌డోర్ ‌(విదేశాల్లో) షూటింగ్‌ చేయలేదట. ఇక మహేశ్‌కు కాస్త సిగ్గు ఎక్కువ. ఎవరితోనూ ఎక్కువగా మాట్లాడేవారు కాదు. అయితే, నమ్రతతో మాట్లాడటం మొదలు పెట్టిన తర్వాత వారి మధ్య స్నేహం చిగురించింది. సెట్‌లో ఎక్కువసేపు కలిసి కబుర్లు చెప్పుకొనేవారు. న్యూజిలాండ్‌ నుంచి వచ్చిన తర్వాత వారి మధ్య ఉన్నది స్నేహం కాదని, ప్రేమని తెలుసుకోవడానికి ఎక్కువ రోజులు పట్టలేదు. ఒకరోజు సడెన్‌గా మహేశ్‌కు నమ్రత ఫోన్‌ చేసిన తన ప్రేమను వ్యక్తపరిచింది. అప్పటికే ఆమె అంటే ఇష్టమున్న మహేశ్‌కు కూడా ఓకే చెప్పేశారు.

అందుకే పెళ్లికి నాలుగేళ్లు

‘వంశీ’ సినిమా సమయంలోనే నమ్రత మరికొన్ని చిత్రాలను కూడా ఒప్పుకొన్నారు. దీంతో పెళ్లికి ముందే తన సినిమాలన్నీ పూర్తి చేయాలనుకున్నారు. అదే సమయంలో మహేశ్‌కు ‘వంశీ’ మూడో సినిమా కావడంతో కెరీర్‌లో ఇంకాస్త కుదురుకునే వరకూ వేచి చూడాలని ఇద్దరూ భావించారు. ఈలోగా నమ్రత అంగీకరించిన సినిమాలను పూర్తి చేసి, పెళ్లి పీటలెక్కారు. పెళ్లి తర్వాత నటించాలా? వద్దా? అన్న దానిపై కూడా అప్పుడే నమ్రత ఒక నిర్ణయానికి వచ్చారు. తాను కూడా సినిమాలు చేస్తే, కుటుంబానికి ఎక్కడ దూరం కావాల్సి ఉంటుందోనని పెళ్లి తర్వాత సినిమాలకు దూరంగా ఉన్నారు.

అందుకే మహేశ్‌ అంటే అంత ప్రేమ

‘‘కుటుంబం కోసం మహేశ్‌ ఏదైనా చేస్తారు. తల్లిదండ్రుల్ని అమితంగా ప్రేమిస్తారు. అదే విధంగా పిల్లల్ని ప్రేమించే గొప్ప తండ్రి కూడా. జీవిత భాగస్వామికి ఎప్పుడూ తోడుగా నిలుస్తారు. మా అమ్మానాన్నలు చనిపోతే ‘ఖలేజా’ షూటింగ్‌కు కొన్నాళ్లు విరామం తీసుకొని మరీ నాకు అండగా నిలిచారు. వీటన్నింటికీ మించి గొప్ప మానవతా వాది. అందుకే మహేశ్‌ అంటే నాకు అంత ప్రేమ, ఆరాధన. మహేశ్‌ను కలవడం జీవితంలో నాకు దక్కిన పెద్ద అదృష్టం. నా పెళ్లే నాకు దక్కిన బహుమతుల్లో అత్యంత ప్రత్యేకమైంది’’ - ఓ సందర్భంలో మహేశ్‌ గురించి నమ్రత