కాబోయేవాడు నా షూస్‌తో సమానం: పూజ

ఆకట్టుకుంటోన్న మోస్ట్‌ ఎలిజిబుల్‌ బ్యాచ్‌లర్‌ టీజర్‌

హైదరాబాద్‌: ‘మ్యారేజ్‌ లైఫ్‌ నుంచి మీరు ఏం కోరుకుంటున్నారు’ అని అమ్మాయిలను అడుగుతున్నారు ‘మోస్ట్‌ ఎలిజిబుల్‌ బ్యాచ్‌లర్‌’ అఖిల్‌. ‘మంచి భర్త, పనుల్లో సాయం చేసే భర్త, ప్రేమ, జాయింట్‌ ఫ్యామిలీ వద్దు’ అంటూ వాళ్లిచ్చిన సమాధానాలు విన్న అఖిల్‌.. ‘కొంచెం వైల్డ్‌గా ఆలోచించండి డార్లింగ్‌’ అంటూ తనకిష్టమైన అమ్మాయి కోసం వెతుకులాట ప్రారంభించారు. అనుకోకుండా పూజాహెగ్డేని కలిశారు. ఆమెతో ప్రేమలో పడ్డారు. మరి, విభిన్న అభిప్రాయాలు ఉన్న వీరిద్దరూ ఒక్కటయ్యారా? లేదా? అనేది తెలియాలంటే కొంతకాలం వేచి చూడాలి.

అఖిల్‌ అక్కినేని-పూజాహెగ్డే జంటగా నటిస్తోన్న లవ్‌ అండ్‌ ఫ్యామిలీ ఎంటర్‌టైనర్‌ ‘మోస్ట్‌ ఎలిజిబుల్‌ బ్యాచిలర్‌’. బొమ్మరిల్లు భాస్కర్‌ దర్శకత్వం వహిస్తోన్న ఈ చిత్రానికి బన్నీ వాసు నిర్మాతగా వ్యవహరిస్తోన్నారు. దసరా పర్వదినాన్ని పురస్కరించుకుని ఆదివారం ఈ సినిమా టీజర్‌ను చిత్రబృందం అభిమానులతో పంచుకుంది. ఇందులోని ఓ సన్నివేశంలో ‘నాకు కాబోయేవాడు నాకు షూస్‌తో సమానం’ అని పూజా చెబుతుంది. ఆ విభిన్నమైన మాటలకు ఫిదా అయిన అఖిల్‌.. ఆమెతో ప్రేమలో పడతాడు. అనంతరం ఆమె వెంటపడతాడు. ఇలా.. వీరి పరిచయం, ప్రేమకు సంబంధించిన పలు సన్నివేశాలను టీజర్‌లో చూపించారు. ఇందులో అఖిల్‌ - పూజాల నటన ఆకట్టుకునేలా ఉంది. అయితే ఈ చిత్రాన్ని వచ్చే ఏడాది సంక్రాంతికి విడుదల చేస్తున్నట్లు చిత్రబృందం ప్రకటించింది.