Naga Chaitanya: ఇద్దరు భామలతో

కథానాయకుడు నాగచైతన్య, దర్శకుడు విక్రమ్‌ కె.కుమార్‌ల కాంబినేషన్‌లో ఓ  వెబ్‌సిరీస్‌ తెరకెక్కుతోన్న సంగతి తెలిసిందే. ‘మనం’, ‘థ్యాంక్‌ యూ’ వంటి చిత్రాల తర్వాత ఈ ఇద్దరి కలయికలో రూపొందుతోన్న మూడో ప్రాజెక్ట్‌ ఇది. విభిన్నమైన హారర్‌ కథాంశంతో తెరకెక్కుతోన్న ఈ సిరీస్‌.. ప్రస్తుతం హైదరాబాద్‌లో శరవేగంగా చిత్రీకరణ జరుగుతోంది. ఇందులో చైతన్య  సరసన ఇద్దరు కథానాయికలు కనిపించనున్నారు. దీంట్లో ఓ నాయికగా కోలీవుడ్‌ భామ ప్రియా భవానిశంకర్‌, మరో పాత్రలో మలయాళీ నటి పార్వతి తిరువోతు నటిస్తున్నారు. ఈ ఇద్దరూ ఇప్పటికే సెట్స్‌లోకి అడుగుపెట్టినట్లు తెలిసింది. ఇందుకు సంబంధించిన ఓ ఫొటోను నటి ప్రియా తన ట్విటర్‌ ఖాతాలో పంచుకుంది. ఈ సిరీస్‌లో నాగచైతన్య ప్రతినాయక ఛాయలున్న పాత్రలో కనిపించనున్నట్లు ప్రచారం వినిపిస్తోంది. దీనికోసం ‘దూత’ అనే టైటిల్‌ ఖరారు చేసినట్లు తెలుస్తోంది. ఈ వెబ్‌సిరీస్‌ త్వరలో ప్రముఖ ఓటీటీ వేదిక అమెజాన్‌ ప్రైమ్‌లో విడుదల కానుంది.