ఇటలీలో ప్రభాస్‌ మేనియా

హైదరాబాద్‌: ‘బాహుబలి’ సినిమా తర్వాత ప్రభాస్‌ ప్రపంచవ్యాప్తంగా గుర్తింపు తెచ్చుకున్నారు. విదేశాల్లో సైతం ఆయనకి అభిమానులున్నారనే విషయం తెలిసిందే. దీంతో ప్రభాస్‌ సినిమాల గురించి విదేశీ మీడియాలో సైతం వార్తలు వస్తుంటాయి. ప్రస్తుతం ప్రభాస్‌ ‘రాధేశ్యామ్‌’ సినిమాలో నటిస్తున్నారు. ఈ సినిమా షూటింగ్‌ గతకొన్నిరోజులుగా ఇటలీలో జరుగుతోంది. చిత్రంలోని కొన్ని కీలకమైన సన్నివేశాలను ఇక్కడ చిత్రీకరిస్తున్నారు. ఈ మేరకు ‘రాధేశ్యామ్‌’ షూటింగ్‌ గురించి ఇటలీ మీడియా ప్రత్యేక కథనాల్ని ప్రసారం చేసింది. దీనికి సంబంధించిన వీడియోలు ప్రస్తుతం నెట్టింట్లో చక్కర్లు కొడుతున్నాయి.

రాధాకృష్ణ దర్శకత్వంలో తెరకెక్కుతోన్న ఈ వింటేజ్‌ ప్రేమకథా చిత్రంలో ప్రభాస్‌, పూజాహెగ్డే జంటగా నటిస్తున్నారు. ఈ చిత్రానికి జస్టిన్‌ ప్రభాకరన్‌ స్వరాలు అందిస్తున్నారు. అలనాటి తార భాగ్యశ్రీ,  సత్యరాజ్‌, జగపతిబాబు, జయరాం ఈ సినిమాలో కీలక సన్నివేశాలు పోషిస్తున్నారు. ఇటీవల విడుదలైన ఈసినిమా మోషన్‌ పోస్టర్‌ ప్రేక్షకుల్ని ఎంతగానో ఆకట్టుకుంటోంది.