‘వి’ మూవీ ఇలా చూసిన రాజమౌళి కుటుంబం

హైదరాబాద్‌: నాని, సుధీర్‌బాబు కీలకపాత్రల్లో మోహనకృష్ణ ఇంద్రగంటి దర్శకత్వం వహించిన చిత్రం ‘వి’. నివేదా థామస్‌, అదితిరావు హైదరీ కథానాయికలు. అమెజాన్‌ ప్రైమ్‌ వేదికగా విడుదలైన ఈ చిత్రం యాక్షన్‌ థ్రిల్లర్‌గా ఆకట్టుకుంటోంది. ముఖ్యంగా ప్రతినాయక ఛాయలున్న పాత్రలో నాని వైవిధ్యమైన నటన కనబరిచారు. తాజాగా ఈ చిత్రాన్ని రాజమౌళి కుటుంబం వీక్షించింది. ఈ సందర్భంగా తీసిన ఫొటోను రాజమౌళి తనయుడు ఎస్‌.ఎస్‌. కార్తికేయ సామాజిక మాధ్యమాల వేదికగా అభిమానులతో పంచుకున్నారు.

‘‘వి’ ఫస్ట్‌ డే ఫస్ట్‌ షో హంగామాను ఎంతో మిస్సవుతున్నాం. పరిస్థితులు సాధారణంగా ఉండి ఉంటే మేమంతా ఉదయం 8.45నిమిషాలకు ప్రసాద్స్‌లో ఈ సినిమా చూసేవాళ్లం. అయితే, ఇది కూడా ఆసక్తికరంగానే ఉంది.  వి చిత్ర బృందానికి శుభాకాంక్షలు’’ అని ట్వీట్‌ చేశారు. ఈ ఫొటోలు రాజమౌళితో పాటు ఆయన కుటుంబ సభ్యులందరూ హోం థియేటర్లో సినిమాను చూస్తూ ఆస్వాదించారు.

మరోవైపు ‘వి’ చిత్ర బృందం కూడా కలిసి ఈ సినిమాను చూసింది. నాని, సుధీర్‌బాబు, నివేదా థామస్‌, అదితిరావు హైదరీ, ఇంద్రగంటి, దిల్‌రాజు కలిసి ఈ సినిమాను చూశారు. ఈ సందర్భంగా కేక్‌ కట్‌ చేసి సంబరాలు జరుపుకొన్నారు.