Abhiram Daggubati: అభిరామ్‌ ‘అహింస’

కొత్త నటుల్ని తెరకు పరిచయం చేయడంలో సిద్ధహస్తుడైన దర్శకుడు తేజ. కొత్త   తరంతో కలిసి ఎన్నో  విజయాల్ని సొంతం చేసుకున్నారాయన. ఈసారి  డి.రామానాయుడు మనవడు, ప్రముఖ నిర్మాత డి.సురేష్‌బాబు తనయుడు అభిరామ్‌ దగ్గుబాటిని పరిచయం చేస్తున్నారు. తేజ - అభిరామ్‌ కలయికలోని సినిమాని ఆనంది ఆర్ట్‌ క్రియేషన్స్‌ పతాకంపై పి.కిరణ్‌ నిర్మిస్తున్నారు. దర్శకుడు తేజ పుట్టినరోజు సందర్భంగా మంగళవారం ఈ సినిమా పేరుని ప్రకటించడంతోపాటు, ప్రి లుక్‌ని   విడుదల చేశారు. ‘అహింస’ అనే పేరుని ఖరారు చేసినట్టు తెలిపింది చిత్రబృందం. రక్తం కారుతున్న ముఖంతో ఉన్న ప్రి లుక్‌ని విడుదల చేశారు. ఆర్‌.పి.పట్నాయక్‌ ఈ సినిమాకి సంగీతం అందిస్తున్నారు. చిత్రీకరణ పూర్తయింది. ప్రస్తుతం నిర్మాణానంతర కార్యక్రమాలు జరుగుతున్నాయి. త్వరలోనే విడుదల తేదీని ప్రకటిస్తామని సినీ వర్గాలు తెలిపాయి. ఈ చిత్రానికి ఛాయాగ్రహణం: సమీర్‌రెడ్డి, కూర్పు: కోటగిరి వెంకటేశ్వరరావు, పాటలు: చంద్రబోస్‌, పోరాటాలు: రియల్‌ సతీష్‌.

‘విక్రమాదిత్య’ మొదలు

‘అహింస’ చిత్రీకరణని పూర్తి చేసిన తేజ... ‘విక్రమాదిత్య’ ఓ ప్రేమకథని తెరకెక్కిస్తున్నారు. లక్ష్మీ నరసింహ ప్రొడక్షన్స్‌ పతాకంపై నల్లమలుపు శ్రీనివాస్‌ (బుజ్జి) నిర్మిస్తున్న ఈ చిత్రం 1836వ సంవత్సరంలో సాగే కథతో తెరకెక్కనుంది. ఆ సమయంలోనే సర్‌ ఆర్ధర్‌ కాటన్‌ ధవళేశ్వరం బ్యారేజీని నిర్మించారనీ, ఈ కథకీ... ఆ వంతెనకీ సంబంధం ఉంటుందని సినీ వర్గాలు తెలిపాయి. మంగళవారమే చిత్రీకరణని ప్రారంభించారు. తేజ దర్శకత్వం వహించిన ‘జయం’ చిత్రీకరణ సరిగ్గా 20 ఏళ్ల కిందట ఇదే సమయంలో మొదలైందని, ‘విక్రమాదిత్య’ ఆయన కలల ప్రాజెక్ట్‌గా భారీ బడ్జెట్‌తో రూపొందుతుందని ఈ సినీ వర్గాలు తెలిపాయి.