వీళ్లకు కావాల్సింది ఆడవాళ్ల ఆకారమే తప్ప..!

ఇంటర్నెట్‌ డెస్క్: ప్రస్తుతం ఓటీటీ వేదికగా వైవిధ్యమైన కథా చిత్రాలు ప్రేక్షకుల ముందుకొస్తున్నాయి. అలా వస్తున్న చిత్రాల్లో ‘సీతా ఆన్‌ ది రోడ్‌’ ఒకటి. ప్రణీత్‌ యారోన్‌ దర్శకుడు. సాహస ప్రయాణం చేయాలని నిర్ణయించుకున్న ఐదుగురు అమ్మాయిలు, ఎలాంటి అడ్డంకులను ఎదుర్కొంటారు? ఆ సమయంలో వారు ఎలాంటి నిర్ణయాలు తీసుకున్నారు? ఆ నిర్ణయాలతో వారికి ఎటువంటి స్వేచ్ఛ లభించింది? అక్కడి నుంచి వారి ప్రయాణం ఎలా సాగిందనేది ‘సీతా ఆన్‌ ది రోడ్‌’.

కల్పిక గణేష్‌, గాయత్రి గుప్తా, ఖతేరా హకీమి, ఉమా లింగయ్య, నేసా ఫర్హాదిలు ప్రధాన పాత్రల్లో నటిస్తున్న చిత్రం మార్చి 5న జీప్లెక్స్‌లో విడుదల కానుంది.  సినిమా గురించి దర్శకుడు యారోన్‌ స్పందిస్తూ.. ‘‘ఈ చిత్రం మహిళ స్వీయ అన్వేషణ ప్రయాణాన్ని వివరిస్తుంది. జీవితంలో అనుకోని అడ్డంకులు ఎదురైనప్పుడు, అంతర్గత స్వరాన్ని వినిపించాలనుకున్న సమయంలో ఏమీ జరుగుతుందో ‘సీతా ఆన్‌ ది రోడ్‌’ లో చూడొచ్చని’’ తెలిపారు. జేపీ మోషన్‌ పిక్చర్స్ పతాకంపై రూపొందుతున్న చిత్రానికి ప్రనూప్‌ జవహార్‌, ప్రియాంక తాతి నిర్మాతలు.