వీడియోకాల్‌ చేసి.. కథ చెప్పారు..!

పాప్‌ సింగర్‌ షర్లీ సెటియా

హైదరాబాద్‌: తన పాటలతో ఎంతో మంది అభిమానులను సొంతం చేసుకున్న న్యూజిలాండ్‌ పాప్‌ సింగర్‌ షర్లీ సెటియా త్వరలో కథానాయికగా తెలుగు తెరకు పరిచయమవనున్న విషయం తెలిసిందే. అనీశ్‌ కృష్ణన్‌ దర్శకత్వంలో తెరకెక్కనున్న ఓ రొమాంటిక్‌ కామెడీ చిత్రంలో నాగశౌర్య సరసన ఆమె సందడి చేయనున్నారు. ఈ నేపథ్యంలో తాజాగా ఆమె దక్షిణాది చిత్ర పరిశ్రమ గురించి పలు ఆసక్తికర వ్యాఖ్యలు చేశారు.

‘నాకు తెలుగు అర్థం కాదు. కానీ దక్షిణాదిలో తెరకెక్కిన చాలా చిత్రాలను సబ్‌టైటిల్స్‌తో చూసి ఎంజాయ్‌ చేశాను. తెలుగు సినిమాలో నటించడం సంతోషంగా ఉంది. నాకు సంబంధించిన పలు వీడియోలను దర్శకుడు అనీశ్‌ యూట్యూబ్‌లో చూసి.. లాక్‌డౌన్‌ సమయంలో ఫోన్‌ ద్వారా నన్ను సంప్రదించారు. వీడియో కాల్‌ చేసి స్ర్కిప్ట్‌ వివరించారు. కథ  బాగా నచ్చడంతో వెంటనే ఓకే చేప్పేశాను. తెలియని భాషే అయినప్పటికీ ఆ సినిమాలో నటించడానికి ఎంతో ఆసక్తిగా ఎదురుచూస్తున్నా’

‘నటి కావాలనే ఉద్దేశంలో న్యూయార్క్‌ ఫిల్మ్‌ అకాడమీలో చేరాను. కానీ నేను సింగర్‌ని కావాలని విధి ముందే నిర్ణయించింది. నా పాటల పట్ల ప్రేక్షకులు చూపిస్తున్న ప్రేమాభిమానాలకు ఎంతో సంతోషిస్తున్నా.’

‘2016లో ఓసారి హైదరాబాద్‌లోని ఓ మాల్‌కి వచ్చాను. ఆ విషయాన్ని సోషల్‌మీడియా వేదికగా అభిమానులకు తెలియజేశాను. దాంతో నన్ను కలిసేందుకు వందలమంది ఆ మాల్‌ వద్దకు చేరుకున్నారు. వాళ్లందర్నీ చూసి షాక్‌ అయ్యాను. తెలుగు సినిమాతో కథానాయికగా పరిచయమవుతున్నానని ఇటీవల తెలియజేయగానే ఎంతోమంది నాపై మరింత అభిమానం కురిపిస్తున్నారు’ అని షర్లీ సెటియా వివరించారు.