‘వి’ స్పెషల్‌ ఫొటో పంచుకున్న నాని

హైదరాబాద్‌: నాని, సుధీర్‌బాబు కీలక పాత్రల్లో నటిస్తున్న చిత్రం ‘వి’. ఇంద్రగంటి మోహనకృష్ణ దర్శకత్వం వహిస్తున్నారు. నివేదా థామస్‌, అదితిరావు హైదరీ కథానాయికలు. శనివారం అమెజాన్‌ ప్రైమ్‌ వేదికగా ఈ చిత్రం విడుదల కానుంది. ఈ సందర్భంగా నాని ఈ సినిమాలోని ఓ స్పెషల్‌ ఫొటోను అభిమానులతో పంచుకున్నారు.

నాని ఇందులో ప్రతినాయకుడిగా నటిస్తున్న సంగతి తెలిసిందే. ఇప్పటివరకూ విడుదల చేసిన ప్రచార చిత్రాలు, ట్రైలర్‌లో గుబురు గడ్డం, మెలి తిరిగిన మీసంతో కనిపించిన నాని తాజా ఫొటోలో లవర్‌బాయ్‌లా అందంగా కనిపించారు. అదితిరావు హైదరీని కౌగలించుకుని చిరు నవ్వులు చిందిస్తున్న ఫొటో ఆకట్టుకుంటోంది. అయితే, ట్రైలర్‌లో నాని పూర్తి భిన్నంగా ఉండటం విశేషం. మరి నాని విలన్‌గా మారడానికి కారణం ఎవరు? ఎలాంటి పరిస్థితుల్లో మారాల్సి వచ్చింది? తుపాకి పట్టిన తర్వాత ఎదురైన పరిస్థితులు ఏంటి? తెలియాలంటే సినిమా చూడాల్సిందే.