ఇకపై ప్రతి సినిమాకీ ఇలా చేస్తా..!

ఆదితి, నివేదాను నామినేట్‌ చేసిన సుధీర్‌

హైదరాబాద్‌: ఇకపై తాను నటించబోయే ప్రతి సినిమాకీ గుర్తుగా ఓ మొక్కను నాటుతానని నటుడు సుధీర్‌బాబు ప్రతిజ్ఞ చేశారు. తాజాగా ఆయన గ్రీన్‌ ఇండియా ఛాలెంజ్‌లో పాల్గొన్నారు. నటుడు నవీన్‌ కృష్ణ నామినేట్‌ చేయడంతో ఛాలెంజ్‌ను స్వీకరించిన సుధీర్‌ ఓ మొక్కను నాటి దానికి ‘వి’ అనే పేరు పెట్టారు. ఈ మేరకు ఆయన ట్వీట్‌ చేశారు. ‘గ్రీన్‌ ఇండియా ఛాలెంజ్‌ పేరుతో గొప్ప కార్యక్రమానికి నాంది పలికిన ఎంపీ సంతోష్‌కుమార్‌కి అభినందనలు. ఈ ఛాలెంజ్‌కు నన్ను నామినేట్‌ చేసిన నవీన్‌ కృష్ణకు ధన్యవాదాలు. ఇకపై నేను చేయబోయే ప్రతి చిత్రానికి గుర్తుగా ఓ మొక్కను నాటుతానని, అలాగే ఆ సినిమా పేరుని మొక్కకు పెడతానని ప్రతిజ్ఞ చేస్తున్నాను. నా ఈ ప్రయత్నాన్ని ‘వి’ సినిమా నుంచి ప్రారంభిస్తున్నాను. దర్శకుడు మోహన్‌కృష్ణ ఇంద్రగంటి, నిర్మాత దిల్‌రాజు, ఆదితిరావు హైదరీ, నివేదా థామస్‌ను ఈ ఛాలెంజ్‌ కోసం నామినేట్‌ చేస్తున్నాను’ అని సుధీర్‌బాబు పేర్కొన్నారు.

సుధీర్‌బాబు పవర్‌ఫుల్ పోలీస్‌ అధికారిగా నటించిన ‘వి’ చిత్రం ఇటీవల ఓటీటీ వేదికగా విడుదలైంది. నాని ప్రతినాయకుడిగా నటించిన ఈ సినిమాలో నివేదా థామస్‌, ఆదితిరావు హైదరీ కథానాయికలుగా మెప్పించారు. మోహన్‌కృష్ణ ఇంద్రగంటి దర్శకత్వంలో తెరకెక్కిన ఈ చిత్రానికి దిల్‌రాజు నిర్మాతగా వ్యవహరించారు. ఉగాది కానుకగా థియేటర్లలో సందడి చేయాల్సిన ఈ సినిమా లాక్‌డౌన్‌ కారణంగా వాయిదా పడింది. అమెజాన్‌ ప్రైమ్‌ వేదికగా ఇటీవల విడుదలై ప్రేక్షకులను అలరిస్తోంది.