భారత దేశమంత స్వచ్ఛమైన సినిమా

సుమంత్‌ అశ్విన్‌, శ్రీకాంత్‌, భూమిక, తాన్య హోప్‌ ప్రధాన పాత్రల్లో గురు పవన్‌ తెరకెక్కించిన చిత్రం ‘ఇదే మా కథ’. జీ మహేశ్‌ నిర్మించారు. ఈ సినిమా శనివారం విడుదలవుతోంది. ఈ నేపథ్యంలోనే ఇటీవల హైదరాబాద్‌లో ప్రీరిలీజ్‌ వేడుక నిర్వహించారు. ఈ కార్యక్రమానికి ఎం.ఎస్‌.రాజు, బి.గోపాల్‌ ముఖ్య అతిథులుగా విచ్చేశారు. ఈ సందర్భంగా శ్రీకాంత్‌ మాట్లాడుతూ.. ‘‘ఓ నలుగురు వ్యక్తుల కథ ఇది. వారి లక్ష్యాలేంటి? వాటిని ఎలా చేరుకున్నారు? ఈ క్రమంలో ఒకరికొకరు ఎలా సహాయ పడ్డారు? అనేది మిగతా కథాంశం. సినిమా ఎంతో అద్భుతంగా వచ్చింది. సుమంత్‌ను చూస్తే నన్ను నేను చూసుకున్నట్లుంది. లద్దాఖ్‌లో నీళ్లలో జంప్‌ చేసి, ఓ యాక్షన్‌ సీక్వెన్స్‌ చేశాడు. అంత చలిలో అలా చేయడం చూసి నాకు భయమేసింది. ఈ సినిమా కచ్చితంగా విజయవంతమవుతుంది’’ అన్నారు. ‘‘ఈ చిత్రం నాకెంతో ప్రత్యేకం. దక్షిణాది నుంచి ఉత్తరాది వరకు అంతా చూపించాం. ఈ ప్రయాణంలో శ్రీకాంత్‌, భూమిక గారితో పని చేయడం నాకెంతో ఆనందాన్నిచ్చింది. కథను నమ్మి, ఎంతో ధైర్యంతో మహేష్‌ ఈ చిత్రాన్ని తీశార’’న్నారు హీరో సుమంత్‌ అశ్విన్‌. దర్శకుడు మాట్లాడుతూ.. ‘‘నేను రాయల్‌ ఎన్‌ఫీల్డ్‌ బైక్‌ కొన్న సమయంలో ఓ కొత్త ప్రపంచంలోకి వెళ్లాను. 5వేల కిలోమీటర్లు జర్నీ చేసుకుంటూ ఈ కథ రాశాను. భారత దేశం ఎంత స్వచ్ఛంగా ఉంటుందో.. మా సినిమా అంతే స్వచ్ఛంగా ఉంటుంది. కథ నమ్మి సినిమా చేయడానికి ముందుకొచ్చిన శ్రీకాంత్‌, భూమిక, సుమంత్‌, తాన్యలకు థ్యాంక్స్‌’’ అన్నారు.