RRR: మేకింగ్‌ మామూలుగా లేదు..

అక్టోబరు 13న ప్రేక్షకుల ముందుకు

హైదరాబాద్‌: తెలుగు సినీ ఖ్యాతిని ప్రపంచదేశాలకు విస్తరించిన దర్శకధీరుడు రాజమౌళి ఎంతో ప్రతిష్ఠాత్మకంగా తెరకెక్కిస్తున్న చిత్రం ‘ఆర్‌ఆర్‌ఆర్‌ రౌద్రం రణం రుధిరం’. మెగా పవర్‌స్టార్‌ రామ్‌చరణ్‌, యంగ్‌ టైగర్‌ ఎన్టీఆర్‌ ప్రధాన పాత్రధారులుగా రూపుదిద్దుకుంటోన్న ఈ సినిమా కోసం దేశవ్యాప్తంగా సినీ ప్రియులు ఎంతో ఆసక్తిగా ఎదురుచూస్తున్నారు. ఈ నేపథ్యంలో ‘ఆర్‌ఆర్‌ఆర్‌’ మేకింగ్‌ వీడియోని గురువారం ఉదయం చిత్రబృందం విడుదల చేసింది. ‘రోర్‌ ఆఫ్‌ ఆర్‌ఆర్‌ఆర్‌’ పేరుతో బయటకు వచ్చిన ఈ వీడియో ప్రతి ఒక్కర్నీ ఎంతగానో ఆకర్షిస్తోంది. చరణ్‌, తారక్‌లకు సంబంధించిన కొన్ని సన్నివేశాల చిత్రీకరణను ఇందులో చూపించారు. భారీ యాక్షన్‌ బ్యాక్‌డ్రాప్‌ని సైతం ఈ వీడియో ద్వారా ప్రేక్షకులకు అలా.. రుచి చూపించారు. ఈ ఏడాది అక్టోబరు 13న ప్రపంచవ్యాప్తంగా సినిమాను విడుదల చేస్తున్నట్లు చిత్రబృందం నేడు అధికారికంగా ప్రకటించింది. 

దాదాపు రూ.450 కోట్ల భారీ బడ్జెట్‌తో తెరకెక్కుతోన్న ఈ సినిమాలో రామ్‌చరణ్‌ అల్లూరి సీతారామరాజుగా, తారక్‌ కొమురం భీమ్‌గా కనిపించనున్నారు. చరణ్‌కి జోడీగా సీత పాత్రలో బాలీవుడ్‌ బ్యూటీ ఆలియాభట్‌ సందడి చేయనున్నారు. అలాగే తారక్‌ ప్రేయసిగా హాలీవుడ్‌ భామ ఒలీవియా మోరీస్‌ నటిస్తున్నారు. అజయ్‌ దేవ్‌గణ్‌, సముద్రఖని, శ్రియ ఈ సినిమాలో కీలకపాత్రలు పోషిస్తున్నారు. చిత్రంలోని ఆయా పాత్రల్ని పరిచయం చేస్తూ విడుదలైన ‘భీమ్‌ ఫర్‌ రామరాజు’, ‘రామరాజు ఫర్‌ భీమ్‌’, ‘అజయ్‌ దేవ్‌గణ్‌ బర్త్‌డే స్పెషల్‌ వీడియో’, ఆలియాభట్‌, ఒలీవియా, తారక్‌-చెర్రీ పోస్టర్లు ఇప్పటికే ప్రేక్షకుల్ని ఫిదా చేసేశాయి. ఈ క్రమంలో తాజాగా విడుదలైన మేకింగ్‌ వీడియో సినీ ప్రియుల్లో అంచనాలు పెంచుతోంది.