Pawankalyan: మరో రీమేక్‌ కోసం...?

పవన్‌కల్యాణ్‌ - త్రివిక్రమ్‌ కలిసి మరో సినిమా చేయబోతున్నారా? ఈసారి కూడా ‘భీమ్లానాయక్‌’ తరహాలోనే తెరకెక్కనున్న మరో రీమేక్‌ కోసం త్రివిక్రమ్‌ స్క్రిప్ట్‌ని సిద్ధం చేస్తున్నారా? ఈ ప్రశ్నలకి సమాధానం అవుననే వినిపిస్తున్నాయి తెలుగు సినీ    పరిశ్రమ వర్గాలు. తమిళంలో సముద్రఖని దర్శకత్వంలో తెరకెక్కిన ‘వినోదయ చిత్తం’ సినిమా తెలుగులో పవన్‌కల్యాణ్‌ కథానాయకుడిగా రీమేక్‌ కానుందని సమాచారం. పీపుల్స్‌ మీడియా ఫ్యాక్టరీ ఈ చిత్రాన్ని నిర్మించేందుకు సన్నాహాలు చేస్తోంది. ఈ సినిమాని మాతృకలో తెరకెక్కించిన సముద్రఖని తెలుగులోనూ దర్శకత్వం వహించనున్నట్టు సమాచారం. ఈ సినిమాకి త్రివిక్రమ్‌ స్క్రీన్‌ప్లే, మాటలు సమకూరుస్తున్నట్టు తెలిసింది. క్రిష్‌ తెరకెక్కిస్తున్న ‘హరి హర వీర మల్లు’తోపాటే ఈ సినిమాని పూర్తి చేసే ఆలోచనలో ఉన్నట్టు సమాచారం. పవన్‌కల్యాణ్‌తోపాటు ఇందులో సాయిధరమ్‌ తేజ్‌ కూడా నటించే అవకాశాలున్నట్టు తెలుస్తోంది.