ఏదైనా చేసి చూపించాలి: యామీ గౌతమ్‌

ముంబయి: విక్కీడోనర్‌తో బాలీవుడ్‌లో అరంగేట్రం చేసిన బ్యూటీ యామీ గౌతమ్‌. గతేడాది ‘ఉరి’, ‘బాలా’   చిత్రాలతో విజయాలనందుకుంది.  ‘నువ్విలా’, ‘గౌరవం’, ‘కొరియర్‌ బాయ్‌ కల్యాణ్‌’ చిత్రాల్లోనూ నటించి తెలుగులోనూ మెప్పించింది. సినిమాల్లో మొదటినుంచి వైవిధ్యాన్ని కనబరుస్తూ వస్తోందీ భామ. పాత్రల ఎంపికపై వేసిన ప్రశ్నకు సమాధానంగా.. ‘‘ఇలాంటి పాత్రల్లోనే నటించాలని నన్ను నేను సంకెళ్లతో బందీ చేసుకోను. సాధ్యమైనంత మేర ఎక్కువగా పనిచేస్తూ, మంచి దర్శకుల చిత్రాల్లో నటించాలనే కోరుకుంటాను. కామెడీ, సోషల్‌ డ్రామా, హారర్‌ ఇలా అన్ని రకాల చిత్రాలు చేయడం ఇష్టం. ముఖ్యంగా హాస్య చిత్రాల్లో నటించాలనుంటుంది. విభిన్నమైన నటిగా నిరూపించుకోవాలన్న కోరిక ఉంది. కానీ మహిళలకు అలాంటి పాత్రలు అరుదుగా దక్కుతాయి’ అని అంటోంది యామి. ‘‘నా కెరీర్‌లో సరైన దారిలోనే వెళ్తున్నానా? లేదా? అని సందిగ్ధంలో పడిన సందర్భాలున్నాయి. ఆ క్లిష్ట సమయంలో కుటుంబం  సహకారంతో గట్టెక్కాను. ఐఏఎస్‌ అధికారి కావాల్సిన సమయంలో సినిమా కోసం ముంబయి వచ్చావ్‌. అలా వచ్చినందుకైనా ఏదైనా చేసి చూపించాలి అని ఎవరో తరచూ చెవిలో చెబుతున్నట్లు అనిపిస్తుంది’’ అని యామీ తెలిపింది. ప్రస్తుతం ఆమె ‘భూత్‌ పోలీస్‌’ చిత్రీకరణలో బీజీగా ఉంది.

ఇవీ చదవండి

చదువు వదులుకుని.. ఇండస్ట్రీలోకి అడుగుపెట్టి..

కోపంతో భర్తను కారు నుంచి దింపేసిన ప్రియాంక