KGF 2: ‘కేజీయఫ్‌2’ టీమ్‌కు ఆమీర్‌ఖాన్‌ క్షమాపణలు.. రాఖీభాయ్‌కి ప్రచారం చేస్తా!

ఇంటర్నెట్‌డెస్క్‌: తనని ‘పర్‌ఫెక్ట్‌ మ్యాన్‌’ అని ఎందుకు అంటారో మరోసారి నిరూపించారు బాలీవుడ్‌ అగ్ర కథానాయకుడు ఆమీర్‌ఖాన్‌. ఆయన కథానాయకుడిగా అద్వైత్‌ చందన్‌ దర్శకత్వంలో తెరకెక్కుతున్న చిత్రం ‘లాల్‌సింగ్‌ చద్దా’. కరీనా కపూర్‌, నాగచైతన్య కీలక పాత్రలు పోషిస్తున్నారు. కరోనా కారణంగా వాయిదా పడుతూ వచ్చిన ఈ చిత్రం ఏప్రిల్‌ 14, 2022న ప్రేక్షకుల ముందుకు తీసుకురానున్నట్లు ఇటీవల చిత్ర బృందం ప్రకటించింది. అయితే, అంతకు ముందే అదే రోజున తమ సినిమాను విడుదల చేయనున్నట్లు ‘కేజీయఫ్‌2’ చిత్ర బృందం కూడా ప్రకటించింది. ప్రశాంత్‌నీల్‌ దర్శకత్వంలో యశ్‌ కథానాయకుడిగా తెరకెక్కిన ‘కేజీయఫ్‌2’ పైనా భారీ అంచనాలు ఉన్నాయి. దీంతో రెండు భారీ చిత్రాలు ఒకే రోజున విడుదలైతే బాక్సాఫీస్‌ వసూళ్లను షేర్‌ చేసుకోవాల్సి వస్తుంది. ఈ నేపథ్యంలో ఓ ఇంటర్వ్యూలో ఆమీర్‌ఖాన్‌ మాట్లాడుతూ.. ‘కేజీయఫ్‌2’ చిత్ర బృందానికి క్షమాపణలు చెప్పినట్లు తెలిపారు.

‘‘లాల్‌సింగ్‌ చద్దా’ బైసఖి రోజున(ఏప్రిల్‌ 14)న రావటం సరైన నిర్ణయమే. అయితే, మరో పెద్ద సినిమా నిర్మాత విడుదల తేదీని ప్రకటించారని తెలిసి కావాలనే మేము ఆ రోజును ఎంచుకోలేదు. బైసఖి రోజు సినిమాను తీసుకురావాలని నిర్ణయం తీసుకున్నాం. విడుదల తేదీని ప్రకటించే ముందు ‘కేజీయఫ్‌2’ నిర్మాత విజయ్‌ కిరంగదుర్‌, దర్శకుడు ప్రశాంత్‌ నీల్‌, కథానాయకుడు యశ్‌లకు క్షమాపణ చెబుతూ, నా పరిస్థితి వివరిస్తూ లేఖరాశా. నిర్మాత పాలిట లాక్‌డౌన్‌ ఎలాంటి క్లిష్ట పరిస్థితిని తీసుకొచ్చిందో చెప్పా. వాళ్లు కూడా అర్థం చేసుకున్నారు. మా నిర్ణయానికి మద్దతు తెలిపారు. వారి సానుకూల ధోరణికి చాలా సంతోషంగా అనిపించింది’’ అని ఆమీర్‌ చెప్పుకొచ్చారు.

ఇక ‘కేజీయఫ్‌’ సినిమాకు తాను అభిమానినని ఈ విషయమై యశ్‌కు ఫోన్‌ చేసి మాట్లాడినట్లు ఆమీర్‌ తెలిపారు. ‘‘యశ్‌తో ఫోన్‌లో మాట్లాడా. మా ఇద్దరి మధ్య ఎంతో చక్కని సంభాషణ జరిగింది. ‘కేజీయఫ్‌’కు దేశవ్యాప్తంగా మంచి గుర్తింపు వచ్చింది. ఒకరకంగా చెప్పాలంటే అదొక బ్రాండ్‌ అయిపోయింది. ప్రేక్షకులు సీక్వెల్‌ కోసం ఎంతగానో వేచి చూస్తున్నారు. ‘కేజీయఫ్‌2’, ‘లాల్‌ సింగ్‌ చద్దా’ రెండు వేర్వేరు జోనర్‌లకు సంబంధించి చిత్రాలు. ప్రేక్షకులు రెండింటినీ ఆదరిస్తారు. ‘కేజీయఫ్‌2’కు నేనే స్వయంగా ప్రచారం చేస్తా. లక్షలాది అభిమానుల మాదిరిగానే నేను కూడా ‘కేజీయఫ్‌’కు అభిమానిని. ఏప్రిల్‌ 14న తప్పకుండా ఆ సినిమాను థియేటర్‌లో చూస్తా’’ అని యశ్‌తో ఆమీర్‌ అన్నారట. మరి ఏప్రిల్‌ 14న ఈ రెండు సినిమాలే వస్తాయా? లేక ఇంకేదైనా బరిలోకి వస్తుందా? అన్నది తెలియాలంటే ఇంకొన్ని రోజులు వేచి చూడాల్సిందే!

► Read latest Cinema News and Telugu News