ఓటీటీతో ఆ ఒత్తిడి లేదు

ముంబయి: థియేటర్‌లో ఓ సినిమా విడుదలవుతుందంటే ప్రారంభ వసూళ్లే కీలకం. వాటి గురించి దర్శకనిర్మాతలు, హీరోలు చాలా ఆత్రుతగా ఉంటారు. అదే ఓటీటీలో సినిమా విడుదలైతే ఆ ఒత్తిడే ఉండదు అంటున్నారు ప్రముఖ బాలీవుడ్‌ కథానాయకుడు అభిషేక్‌ బచ్చన్‌. కరోనా దెబ్బకు గత ఏడాదిగా చాలా సినిమాలకు ఓటీటీ దిక్కైంది. అభిషేక్‌ నటించిన ‘లూడో’, ‘ది బిగ్‌ బుల్‌’ చిత్రాలు ఓటీటీ ద్వారానే ప్రేక్షకుల ముందుకొచ్చాయి. ఓ ఆన్‌లైన్‌ ఇంటర్వ్యూలో అభిషేక్‌బచ్చన్‌ మాట్లాడుతూ ‘‘సినిమా థియేటర్, ఓటీటీ... దేనిలో విడుదలైనా ఆ ఆత్రుత, కంగారు దాదాపు ఒకేలా ఉంటాయి. థియేటర్‌ అయితే వందశాతం, ఓటీటీ అయితే 98 శాతం కంగారు ఉంటుందంతే. థియేటర్‌లో సినిమా విడుదల అంటే ఉండే ఓపెనింగ్‌ కలెక్షన్లు, వీకెండ్‌ వసూళ్లు...ఇలాంటి బాక్సాఫీస్‌ లెక్కల ఒత్తిడి ఓటీటీలతో లేదు’’అని చెప్పారు అభిషేక్‌.