Vishal: పెను ప్రమాదం నుంచి బయటపడ్డ విశాల్‌

ఇంటర్నెట్‌ డెస్క్‌: ప్రముఖ నటుడు విశాల్‌ (Vishal) పెను ప్రమాదం నుంచి బయటపడ్డారు. విశాల్‌ హీరోగా దర్శకుడు అధిక్‌ రవిచంద్రన్‌ దర్శకత్వంలో ‘మార్క్‌ ఆంటోనీ’ చిత్రం తెరకెక్కుతోన్న సంగతి తెలిసిందే. ఈ సినిమాలోని యాక్షన్‌ సన్నివేశాన్ని చెన్నైలో చిత్రీకరిస్తుండగా ప్రమాదం చోటుచేసుకుంది. సీన్‌లో భాగంగా విశాల్‌ నేలపై పడిపోగా..  అదే సమయంలో వెనక నుంచి ఓ భారీ ట్రక్కు వేగంగా ఆయన పక్కన నుంచి దూసుకెళ్లింది. ఈ విషయాన్ని సోషల్‌ మీడియా వేదికగా తెలియజేస్తూ విజువల్స్‌ను చిత్రబృందం విడుదల చేసింది. ‘సాంకేతిక లోపం కారణంగా ఈ ఘటన జరిగింది. అదృష్టవశాత్తు ఎవరికీ గాయాలుకాలేదు. త్వరలోనే తిరిగి షూటింగ్‌ ప్రారంభిస్తాం’’ అని తెలిపింది. మరోవైపు, ఈ ఘటనపై స్పందించిన విశాల్‌ ‘‘కొన్నిసెకన్లు, కొన్ని అంగుళాల దూరంలో చావును చూశా’’ అంటూ పోస్ట్‌ పెట్టారు. నెటిజన్లు, అభిమానులు జాగ్రత్తగా ఉండండి అంటూ కామెంట్లు పెడుతున్నారు. గతంలోనూ కొన్ని సినిమాల చిత్రీకరణలో విశాల్‌ గాయపడ్డారు.