Aadi: తొందర పాటు తెచ్చే కష్టాలతో..

‘‘ప్రేక్షకుల్ని కడుపుబ్బా నవ్వించే మంచి వినోదాత్మక చిత్రం ‘క్రేజీ ఫెలో’ (Crazy Fellow). సినిమా చూసిన ప్రతి ఒక్కరూ బాగుందని పది మందికి చెప్పుకునేలా ఉంటుంది’’ అన్నారు ఆది సాయికుమార్‌ (Aadi Sai Kumar). ఆయన కథానాయకుడిగా ఫణి కృష్ణ సిరికి తెరకెక్కించిన చిత్రమే ‘క్రేజీ ఫెలో’. కె.కె.రాధామోహన్‌ నిర్మించారు. ఈ సినిమా శుక్రవారం విడుదలవుతోంది. ఈ నేపథ్యంలోనే గురువారం హైదరాబాద్‌లో విలేకర్లతో చిత్ర విశేషాలు పంచుకున్నారు హీరో ఆది.

‘‘చాలా మంచి ఎంటర్‌టైనర్‌ ఇది. దర్శకుడు ఫణి చక్కటి కథ రాసుకున్నాడు. దాన్ని అంతే చక్కగా తెరకెక్కించారు. ఇందులో వినోదం కథలో భాగంగానే ఉంటుంది తప్ప ఎక్కడా ఇరికించినట్లు ఉండదు. తప్పకుండా అందరూ మెచ్చే కథ అవుతుంది. చాలా మంది నన్ను ‘లవ్లీ’, ‘ప్రేమ కావాలి’ లాంటి సినిమాలు చేయమని అడుగుతుంటారు. అలాంటి తరహాలో ఉండే చిత్రమే ఈ ‘క్రేజీ ఫెలో’’.

క్రేజీ పాత్రలో..

‘‘ఈ చిత్రంలో నా పాత్ర చాలా క్రేజీగా ఉంటుంది. తొందరపాటు ఎక్కువ. చెప్పింది పూర్తిగా వినకుండా కష్టాలు కొని తెచ్చుకునే పాత్రగా కనిపిస్తుంది. ఈ క్రమంలో చక్కటి వినోదాన్ని పంచిస్తుంది. ఈ పాత్ర కోసం నేను బరువు కూడా తగ్గాను. ఈ సినిమాలో నర్రా శ్రీనివాస్‌, అనీష్‌ కురువిల్లా తదితరులు కీలక పాత్రలు పోషించారు. ప్రతి పాత్రలోనూ ఓ కొత్తదనం ఉంటుంది’’.

రియలిస్టిక్‌ కథలో నటించాలి..

‘‘కథల విషయంలో నాన్న జడ్జ్‌మెంట్‌ చాలా బాగుంటుంది. నా కథలు కొన్ని నాన్నే వింటారు. కొన్ని నేను విని తొందరపాటు నిర్ణయాలు తీసుకుంటాను (నవ్వుతూ). అందుకే ముందు చక్కగా కథ వినమని చెబుతుంటారు. ఇకపై చాలా జాగ్రత్తగా స్క్రిప్ట్‌లు ఎంచుకొని చేయాలి. నాకు ఎంటర్‌టైనర్లంటే చాలా ఇష్టం. అలాగే ఓ రియలిస్టిక్‌ కథలో నటించాలనుంది’’.

* ‘‘ప్రస్తుతం నేను ‘టాప్‌గేర్‌’ అనే సినిమా చేస్తున్నా. ఓ క్రైమ్‌ థ్రిల్లర్‌ సినిమాలోనూ నటిస్తున్నా. కొన్ని కథలు చర్చల దశలో ఉన్నాయి. అలాగే ‘పులి మేక’ అనే వెబ్‌సిరీస్‌ కూడా చేస్తున్నా’’.