Satish Kaushik: కారులో ఆస్పత్రికి వెళ్తూ.. గుండెపోటుతో కన్నుమూసిన ప్రముఖ నటుడు

ఇంటర్నెట్‌డెస్క్‌: బాలీవుడ్‌(Bollywood)లో విషాదం చోటుచేసుకుంది. ప్రముఖ నటుడు, దర్శకుడు సతీష్‌ కౌశిక్‌ (66) (Satish Kaushik) కన్నుమూశారు. హోలీ వేడుకల కోసం దిల్లీలో ఉన్న స్నేహితుడి ఇంటికి వెళ్లిన ఆయన గురువారం తెల్లవారుజామున గుండెపోటుతో మృతి చెందారు. బుధవారం అర్ధరాత్రి దాటిన తర్వాత ఒంట్లో కాస్త నలతగా అనిపించడంతో డ్రైవర్‌తో కలిసి కారులో ఆస్పత్రికి బయలు దేరిన ఆయన మార్గమధ్యంలోనే గుండెపోటుతో మృతి చెందినట్లు సన్నిహితులు వెల్లడించారు. ఆయన మరణంతో బీటౌన్‌లో విషాద ఛాయలు నెలకొన్నాయి.

అమిత్‌ షా, యోగి ఆదిత్యనాథ్‌, భగవంత్ మాన్‌ వంటి రాజకీయ ప్రముఖులతోపాటు అనుపమ్‌ ఖేర్‌, అక్షయ్‌ కుమార్‌, కరీనా కపూర్‌, అజయ్‌ దేవ్‌గణ్‌, సునీల్‌ శెట్టి, సోనూ సూద్‌, అభిషేక్‌ బచ్చన్‌, కంగనా రనౌత్‌ వంటి సినీ తారలు ఆయన ఆత్మకు శాంతి చేకూరాలంటూ సోషల్‌మీడియాలో పోస్టులు పెట్టారు. ఆయన కుటుంబానికి ప్రగాఢ సానుభూతి తెలియజేశారు.

‘రూప్‌ కీ రాణీ చోరోన్‌ కా రాజా’, ‘ప్రేమ్‌’, ‘తేరే నామ్‌’, ‘షాదీ సే పెహ్లే’ వంటి చిత్రాలకు సతీశ్‌ దర్శకత్వం వహించారు. ‘ఉత్సవ్‌’, ‘సాగర్‌’, ‘మిస్టర్‌ ఇండియా’, ‘రాజాజీ’, ‘భాఘి 3’ వంటి చిత్రాల్లో కీలకపాత్రలు పోషించి నటుడిగానూ మెప్పించారు. ప్రస్తుతం ఆయన ‘ఎమెర్జన్సీ’లో కీలకపాత్ర పోషిస్తున్నారు. ఈ క్రమంలోనే హోలీ వేడుకల కోసం వృత్తిపరమైన జీవితం నుంచి కాస్త బ్రేక్‌ తీసుకుని దిల్లీకి వెళ్లిన ఆయన.. తన స్నేహితుడు జావేద్‌ అక్తర్‌ కుటుంబంతో కలిసి సందడిగా గడిపారు. ఆ ఫొటోలను ట్విటర్‌లో షేర్‌ చేశారు. ఇంతలోనే ఈ విషాదం చోటు చేసుకోవడం ఆయన ఆత్మీయులను దిగ్భ్రాంతికి గురి చేస్తుంది.